சமூக ஊடகங்கள் மற்றும் இணையவழி விளையாட்டு (Gaming) தளங்களில் 13 வயதுக்குட்பட்ட குழந்தைகள், பெற்றோரின் சரிபார்க்கப்பட்ட அனுமதியின்றி கணக்குகளைத் தொடங்குவதைத் தடை செய்யும் ‘SHIELD’ மசோதா நாடாளுமன்றத்தில் தனிநபர் மசோதாவாக முன்மொழியப்பட்டுள்ளது.
பாஜக எம்.பி. பி. வைஜயந்த் பாண்டா, ‘எண்மச் சூழலில் வளரும் சிறுவர்களுக்கான பாதுகாப்பு (SHIELD) மசோதா, 2025’– நாடாளுமன்றத்தில் தாக்கல் செய்தார். SHIELD என்பது Safeguarding Healthy Internet Environments for Little Digital-Natives என்பதன் சுருக்கமாகும்.
இந்த மசோதாவின்படி, 13 வயதுக்குட்பட்ட குழந்தைகள் சமூக வலைதளங்கள் மற்றும் ஆன்லைன் கேமிங் தளங்களில் கணக்குகளைத் தொடங்க, பெற்றோரின் சரிபார்க்கப்பட்ட ஒப்புதல் கட்டாயமாக்கப்படும்.
மேலும், சிறுவர்கள் அணுகக்கூடிய இணையத் தளங்களில் கட்டாய வயது சரிபார்ப்பு (Age Verification) முறைகளை அறிமுகப்படுத்த வேண்டும் என மசோதா முன்மொழிகிறது.
18 வயதுக்குட்பட்ட சிறுவர்களைக் குறிவைத்து அவர்களின் விருப்பங்கள் மற்றும் இணையச் செயல்பாடுகளின் அடிப்படையில் தனிப்பயனாக்கப்பட்ட விளம்பரங்களை (Personalised Ads) வழங்கவும், அவர்களின் இணையச் செயல்பாடுகளைக் கண்காணித்து தரவுகளைச் சேகரித்து சுயவிவரங்களை உருவாக்கவும் (Tracking & Profiling) நிறுவனங்களுக்கு தடை விதிக்கப்படும்.
18 வயதுக்குட்பட்ட சிறுவர்களின் தேடல் விவரங்களை அடிப்படையாகக் கொண்டு தனிப்பயனாக்கப்பட்ட விளம்பரங்களை வழங்கக் கூடாது என்றும் மசோதாவில் தெரிவிக்கப்பட்டுள்ளது. அதற்குப் பதிலாக, அவர்கள் பார்க்கும் பக்கத்தின் உள்ளடக்கத்துக்கு ஏற்ற பொதுவான விளம்பரங்களை (Contextual Advertising) மட்டுமே வழங்க அனுமதிக்கப்படும்.
ஆபாசம், சூதாட்டம், வன்முறை, தீவிரவாதக் கருத்துகள் மற்றும் போதைப்பொருள் தொடர்பான உள்ளடக்கங்கள் சிறுவர்களுக்குக் காட்டப்படாமல் இருப்பதை இணைய நிறுவனங்கள் உறுதி செய்ய வேண்டும் என மசோதா வலியுறுத்துகிறது.
மேலும், குழந்தைகளின் இணையச் செயல்பாடுகளைக் கண்காணிக்கவும், அவர்களின் பாதுகாப்பை உறுதி செய்யவும் பெற்றோர் மற்றும் பாதுகாவலர்களுக்கு உதவும் பெற்றோர் கட்டுப்பாட்டு வசதிகள் (Parental Control Dashboards) வழங்கப்பட வேண்டும் என தெரிவிக்கப்பட்டுள்ளது.
இந்த விதிகளை மீறும் நிறுவனங்களுக்கு அதிகபட்சமாக ரூ.10 கோடி வரை அபராதம் விதிக்க மசோதாவில் பரிந்துரைக்கப்பட்டுள்ளது. தொடர்ச்சியாக விதிமீறல்களில் ஈடுபடும் இணையத் தளங்களை, தகவல் தொழில்நுட்பச் சட்டத்தின் பிரிவு 69A-ன் கீழ் தற்காலிகமாக முடக்கவோ அல்லது தடை செய்யவோ வழிவகை செய்யப்பட்டுள்ளது.
குழந்தைகள் பாதுகாப்பு தொடர்பான விவகாரங்களில் அலட்சியமாகச் செயல்படும் நிறுவனங்களின் நியமிக்கப்பட்ட அதிகாரிகளுக்கு (Designated Officers) தனிப்பட்ட முறையில் அதிகபட்சமாக 3 ஆண்டுகள் வரை சிறைத்தண்டனையும், ரூ.10 லட்சம் வரை அபராதமும் விதிக்க மசோதா வழிவகை செய்கிறது.
ஒரு பெற்றோர் அல்லது பாதுகாவலர், தங்களின் குழந்தைக்கு பாதிப்பை ஏற்படுத்தக்கூடிய உள்ளடக்கம் குறித்து புகார் அளித்தால், அந்த உள்ளடக்கத்தை நிறுவனங்கள் 36 மணி நேரத்திற்குள் சரிபார்த்து நீக்க வேண்டும் என மசோதாவில் தெரிவிக்கப்பட்டுள்ளது.
அந்த உள்ளடக்கம் குழந்தைகள் மீதான பாலியல் துஷ்பிரயோகம் தொடர்பானதாக இருந்தால், அதை 24 மணி நேரத்திற்குள் உடனடியாக நீக்க வேண்டும் எனவும் பரிந்துரைக்கப்பட்டுள்ளது.
சமூக ஊடகங்களின் அல்காரிதம்கள் (Algorithms) சிறுவர்களை அந்தத் தளங்களுக்கு அடிமையாக்கும் வகையிலும், தீவிரமான மற்றும் குறுகிய எண்ணங்களை அவர்களின் மனதில் திணிக்கும் வகையிலும் வடிவமைக்கப்பட்டுள்ளதாக எம்.பி. பி. வைஜயந்த் பாண்டா கவலை தெரிவித்துள்ளார்.
ஆஸ்திரேலியா, இந்தோனேசியா, மலேசியா, பிரிட்டன், பிரேசில் உள்ளிட்ட பல நாடுகள் ஏற்கெனவே சிறுவர்களுக்கான சமூக ஊடகக் கட்டுப்பாடுகளை அறிமுகப்படுத்தியுள்ளன. குறிப்பாக, ஆஸ்திரேலியாவில் 16 வயதுக்குட்பட்டோருக்கான சமூக ஊடகக் கட்டுப்பாடு கொண்டுவரப்பட்டுள்ளது. இதன் பின்னணியில், இந்தியாவிலும் சிறுவர்களின் இணையப் பயன்பாட்டைப் பாதுகாக்கும் நடவடிக்கைகள் முன்மொழியப்பட்டுள்ளன.
எனினும், 16 வயதுக்குட்பட்டோருக்கு சமூக ஊடகத் தடை விதிக்கப்பட்டுள்ள நாடுகளில், சுமார் 70 சதவீத பதின்ம வயதினர் போலியான கணக்குகள் மற்றும் VPN-களைப் பயன்படுத்தி தொடர்ந்து சமூக ஊடகங்களைப் பயன்படுத்தி வருவதாக சில தொழில்நுட்ப வல்லுநர்கள் வாதிடுகின்றனர். இதனால், முழுமையான தடை என்பது நடைமுறையில் சாத்தியமற்றதாக இருக்கலாம் என்றும் அவர்கள் தெரிவிக்கின்றனர்.
இதற்கிடையே, மத்திய மின்னணு மற்றும் தகவல் தொழில்நுட்ப அமைச்சகம் (MeitY), தனது டிஜிட்டல் தனிநபர் தரவு பாதுகாப்புச் சட்டம் (DPDP Act) மூலம் 18 வயதுக்குட்பட்ட அனைவருக்கும் பெற்றோரின் அனுமதியைக் கட்டாயமாக்கும் விதிமுறைகளையும் பரிசீலித்து வருகிறது.
குழந்தைகளின் இணையப் பாதுகாப்பு, தனியுரிமை மற்றும் சமூக ஊடகப் பயன்பாட்டைக் கட்டுப்படுத்தும் நோக்கில் முன்மொழியப்பட்டுள்ள இந்த SHIELD மசோதா, இணைய நிறுவனங்களின் பொறுப்புகளை மேலும் அதிகரிக்கும் வகையில் பல்வேறு விதிமுறைகளை முன்வைத்துள்ளது.