தமிழக வெற்றிக் கழக (தவெக) அரசு நடத்திய முதலீட்டாளர்கள் மாநாட்டில் கையெழுத்தான புரிந்துணர்வு ஒப்பந்தங்கள் குறித்து, திமுக முன்னாள் தொழில்துறை அமைச்சர் டி.ஆர்.பி. ராஜா பல்வேறு கேள்விகளையும் விமர்சனங்களையும் முன்வைத்துள்ளார்.
சென்னை கிண்டியில் அண்மையில் நடைபெற்ற ‘வெற்றி தமிழ்நாடு முதலீட்டாளர்கள் மாநாடு 2026’ நிகழ்ச்சியில், முதலமைச்சர் சி. ஜோசப் விஜய் முன்னிலையில் ரூ.67,452 கோடி மதிப்பிலான 97 புதிய புரிந்துணர்வு ஒப்பந்தங்கள் (MoUs) கையெழுத்தாகின.
இந்த மாநாடு மற்றும் அதில் மேற்கொள்ளப்பட்ட ஒப்பந்தங்கள் தொடர்பாக டி.ஆர்.பி. ராஜா சமூக வலைதளங்களில் விரிவான அறிக்கை ஒன்றை வெளியிட்டுள்ளார். அதில், மாநாட்டில் அறிவிக்கப்பட்ட 97 ஒப்பந்தங்களில் சுமார் 70 ஒப்பந்தங்கள், மொத்த முதலீட்டு மதிப்பில் 75 சதவீதமும், வேலைவாய்ப்புகளில் 83 சதவீதமும், முந்தைய திமுக ஆட்சிக் காலத்தில் இறுதி செய்யப்பட்டவை அல்லது பேச்சுவார்த்தை நடத்தப்பட்ட விரிவாக்கத் திட்டங்கள் என அவர் குற்றம்சாட்டியுள்ளார்.
தற்போதைய மாநாட்டில் புதிதாகக் கொண்டுவரப்பட்டதாகக் கருதக்கூடிய ஒப்பந்தங்கள் 24 மட்டுமே என்றும், அவை மொத்த முதலீட்டு மதிப்பில் 23 சதவீதமும், வேலைவாய்ப்புகளில் 15 சதவீதமும் மட்டுமே என்றும் அவர் தெரிவித்துள்ளார்.
‘ஒப்பந்தங்களின் முழுமையான பட்டியல் ஏன் வெளியிடப்படவில்லை?’
மாநாட்டில் கையெழுத்தான 97 புரிந்துணர்வு ஒப்பந்தங்களின் அதிகாரப்பூர்வமான முழுமையான பட்டியல் இதுவரை ஏன் பொதுவெளியில் வெளியிடப்படவில்லை என்றும் டி.ஆர்.பி. ராஜா கேள்வி எழுப்பியுள்ளார்.
இதுதொடர்பாக அவர் வெளியிட்ட வீடியோவில், “இந்த மாநாட்டில் மேற்கொள்ளப்பட்ட புரிந்துணர்வு ஒப்பந்தங்களின் முழுமையான பட்டியலை பத்திரிகையாளர்களுக்கு ஏன் வெளியிடவில்லை? இவ்வளவு ரகசியம் காப்பது ஏன்?” என கேள்வி எழுப்பினார்.
முதலீட்டு ஊக்குவிப்பில் ஊடகங்களின் பங்கு மிகவும் முக்கியமானது என்றும், குறிப்பாக வணிக ஊடகங்கள் முதலீட்டாளர்களை ஈர்ப்பதில் முக்கியப் பங்காற்றுகின்றன என்றும் அவர் குறிப்பிட்டார்.
‘75 சதவீத திட்டங்கள் ஏற்கெனவே தயாரானவை’
மாநாட்டில் கையெழுத்தான புரிந்துணர்வு ஒப்பந்தங்களில் சுமார் 75 சதவீதம், திமுக ஆட்சிக் காலத்தில் ஏற்கெனவே தயார்படுத்தப்பட்டு பேச்சுவார்த்தை நடத்தப்பட்ட திட்டங்கள் என டி.ஆர்.பி. ராஜா குற்றம்சாட்டியுள்ளார்.
“இந்தத் திட்டங்கள் அனைத்தும் திராவிட மாடல் ஆட்சிக் காலத்தில் நாங்கள் தயார்படுத்தியவை என்பது அனைவருக்கும் தெரியும். இதை பத்திரிகைகள் கண்டுபிடித்துவிடக் கூடாது என்று நினைத்தீர்களா என்று தெரியவில்லை” என அவர் விமர்சித்தார்.
அதேவேளை, முந்தைய ஆட்சியில் முதலீடுகளை ஈர்ப்பதற்காக உருவாக்கப்பட்ட திட்டங்கள் மற்றும் கட்டமைப்புகளைத் தொடர்ந்து பயன்படுத்துவதில் எந்தத் தவறும் இல்லை என்றும் அவர் தெரிவித்துள்ளார்.
‘எல்லாவற்றிலும் ஸ்டிக்கர் ஒட்ட வேண்டிய அவசியமில்லை’
தமிழ்நாட்டில் ஏற்கெனவே உருவாக்கப்பட்டுள்ள முதலீட்டு சூழல் மற்றும் திட்டங்களைத் தொடர்ந்து பயன்படுத்த வேண்டும் என்றும், அவற்றுக்கு புதிய பெயர் அல்லது அடையாளத்தைச் சேர்த்து அரசியல் ரீதியாக மாற்றம் செய்ய வேண்டிய அவசியமில்லை என்றும் டி.ஆர்.பி. ராஜா கூறியுள்ளார்.
“எல்லாவற்றிலும் ஸ்டிக்கர் ஒட்ட வேண்டிய அவசியமில்லை. இத்தனை ஆண்டுகளாக நாங்கள் சந்தைப்படுத்தி, திட்டங்களை உருவாக்கி, முதலீட்டாளர்களிடம் கொண்டு சென்று வைத்துள்ள அந்தச் சூழலைத் தொடர்ந்து தமிழ்நாட்டின் வளர்ச்சிக்குப் பயன்படுத்துவதில் என்ன தவறு?” என அவர் கேள்வி எழுப்பினார்.
இது திமுகவின் தனிப்பட்ட பிராண்டிங் அல்ல என்றும், தமிழ்நாட்டுக்கான பிராண்டிங் என்றும் அவர் குறிப்பிட்டார். ஏற்கெனவே மேற்கொள்ளப்பட்ட பணிகளை வீணாக்காமல், அவற்றை அடுத்தகட்ட வளர்ச்சிக்குப் பயன்படுத்த வேண்டும் என்றும் வலியுறுத்தினார்.
ஆந்திராவை ஒப்பிட்டு விமர்சனம்
முதலீட்டு ஊக்குவிப்பு தொடர்பாக ஆந்திரப் பிரதேச முதலமைச்சர் சந்திரபாபு நாயுடுவின் செயல்பாடுகளையும் டி.ஆர்.பி. ராஜா சுட்டிக்காட்டியுள்ளார்.
சமீபத்தில் நடைபெற்ற மாநில முதலீட்டு ஊக்குவிப்பு அமைப்பின் கூட்டத்தில் சந்திரபாபு நாயுடு நேரடியாகப் பங்கேற்று, மிகப்பெரிய அளவிலான முதலீட்டுத் திட்டங்களுக்கு ஒப்புதல் அளித்ததாக அவர் தெரிவித்தார்.
அதேநேரத்தில், தமிழகத்தில் புதிய ஆட்சி பொறுப்பேற்ற பிறகு, முந்தைய திமுக ஆட்சிக் காலத்தில் பேச்சுவார்த்தை நடத்தி இறுதி செய்யப்பட்ட திட்டங்களுக்கான புரிந்துணர்வு ஒப்பந்தங்களுக்கே தற்போது கையெழுத்திடப்படுவதாகக் கூறப்படுகிறது என்றும் அவர் விமர்சித்துள்ளார்.
சுமார் 75 சதவீத ஒப்பந்தங்கள் முந்தைய ஆட்சியின் பணியின் தொடர்ச்சியாக இருந்தால், புதிய திட்டங்கள் ஏன் வரவில்லை என்றும், ஆட்சி அமைந்து 100 நாட்களாகியும் பெரிய அளவிலான புதிய முதலீடுகள் ஏன் வரவில்லை என்றும் டி.ஆர்.பி. ராஜா கேள்வி எழுப்பியுள்ளார்.
உள்கட்டமைப்பு திட்டங்களில் தெளிவான நிலைப்பாடு தேவை
தமிழகத்திற்கு மேலும் பெரிய அளவில் முதலீடுகள் வருவதற்கு உள்கட்டமைப்பு வசதிகள் மிகவும் முக்கியம் என்றும் டி.ஆர்.பி. ராஜா குறிப்பிட்டுள்ளார்.
குறிப்பாக, ஓசூர் மற்றும் பரந்தூர் விமான நிலையத் திட்டங்கள் தமிழகத்தின் தொழில் வளர்ச்சிக்கு மிகவும் முக்கியமானவை என்றும், இத்திட்டங்கள் தொடர்பாக தற்போதைய ஆட்சியின் நிலைப்பாடு குறித்து இன்னும் தெளிவு ஏற்படவில்லை என்றும் அவர் தெரிவித்துள்ளார்.
தமிழகத்தில் தொழில் வளர்ச்சியைத் தொடர்ந்து முன்னெடுக்க வேண்டுமெனில், முதலீட்டு ஊக்குவிப்புடன் உள்கட்டமைப்பு மேம்பாட்டிலும் அரசு கூடுதல் கவனம் செலுத்த வேண்டும் என அவர் வலியுறுத்தியுள்ளார்.
‘புதிய முதலீடுகளை ஈர்ப்பதில் கவனம் செலுத்த வேண்டும்’
முந்தைய திமுக ஆட்சிக் காலத்தில் தமிழகம் பெற்றிருந்த தொழில் மற்றும் முதலீட்டு வளர்ச்சி தொடர்ந்து முன்னேற வேண்டுமெனில், முதலீட்டு ஊக்குவிப்பில் அரசு கூடுதல் கவனம் செலுத்த வேண்டும் என்றும் டி.ஆர்.பி. ராஜா தெரிவித்துள்ளார்.
புதிய நிறுவனங்கள், புதிய தொழில் திட்டங்கள் மற்றும் வெளிநாட்டு முதலீடுகள் அதிக அளவில் தமிழகத்திற்கு வருவதற்கான சூழலை அரசு உருவாக்க வேண்டும் என்றும் அவர் கூறியுள்ளார்.
மாநிலத்தின் பொருளாதார வளர்ச்சியை அடுத்தகட்டத்திற்கு எடுத்துச் செல்ல புதிய முதலீடுகளை ஈர்ப்பது மிகவும் அவசியம் என்றும், இந்த விவகாரத்தில் முதலமைச்சர் சிறப்பு கவனம் செலுத்த வேண்டும் என்றும் டி.ஆர்.பி. ராஜா வலியுறுத்தியுள்ளார்.