சென்னை: முன்னாள் சென்னை காவல் ஆணையரும், ஐபிஎஸ் அதிகாரியுமான ஏ. அருண், அவரது மனைவியும் ஐஆர்எஸ் அதிகாரியுமான யமுனாதேவி மற்றும் அவர்களது மகள்கள் மீது சொத்துக்குவிப்பு, பணமோசடி உள்ளிட்ட பல்வேறு குற்றச்சாட்டுகளை முன்வைத்து பத்திரிகையாளர் சவுக்கு சங்கர் லஞ்ச ஒழிப்புத்துறையில் புகார் அளித்துள்ளார்.
சென்னை லஞ்ச ஒழிப்புத்துறை அலுவலகத்திற்குச் சென்ற சவுக்கு சங்கர், உயர் அதிகாரிகளைச் சந்தித்து புகார் மனுவை அளித்தார். அதில், அருண் ஐபிஎஸ் அதிகாரத்தைத் தவறாகப் பயன்படுத்தி முறைகேடாக பல நூறு கோடி ரூபாய் மதிப்பிலான சொத்துகளைச் சேர்த்துள்ளதாகவும், அவருக்கும் அவரது குடும்பத்தினருக்கும் எதிராக சொத்துக்குவிப்பு வழக்குப் பதிவு செய்து விசாரணை நடத்த வேண்டும் என்றும் கோரிக்கை விடுத்துள்ளதாகத் தெரிவித்துள்ளார்.
அருண் ஐபிஎஸ் சென்னை மாநகர காவல் ஆணையராகப் பணியாற்றியபோது, ரவுடிகளுடன் தொடர்பு வைத்துக்கொண்டு கட்டப்பஞ்சாயத்தில் ஈடுபட்டதாகவும், பணம் பெற்றுக்கொண்டு போலி என்கவுண்டர் என்ற பெயரில் கொலைகள் நடைபெற்றதாகவும் சவுக்கு சங்கர் குற்றம்சாட்டியுள்ளார். இந்தக் குற்றச்சாட்டுகள் குறித்து கடந்த ஆட்சிக் காலத்திலிருந்தே விசாரணை நடத்த வேண்டும் என தொடர்ந்து வலியுறுத்தி வருவதாகவும் அவர் கூறியுள்ளார்.
மேலும், புதிய அரசு பொறுப்பேற்ற பிறகும் அருண் மீது நடவடிக்கை எடுக்க வேண்டும் என வலியுறுத்தியதாகவும், இருப்பினும் அவரை லஞ்ச ஒழிப்புத்துறையின் இயக்குநராக நியமித்தது குறித்து விமர்சனம் தெரிவித்ததாகவும் சவுக்கு சங்கர் தெரிவித்துள்ளார்.
நிறுவனங்கள் மூலம் சொத்துக்குவிப்பு என புகார்
அருண் மற்றும் அவரது குடும்பத்தினர் தொடர்புடையதாகக் கூறப்படும் நிறுவனங்கள் குறித்தும் சவுக்கு சங்கர் தனது புகாரில் பல்வேறு குற்றச்சாட்டுகளை முன்வைத்துள்ளார்.
சென்னை மயிலாப்பூரில் இருந்து செயல்பட்டு வருவதாகக் கூறப்படும் வெங்கடேச பெருமாள் பிரைவேட் லிமிடெட் நிறுவனத்தில், அருணின் மகள்களான சார்வியா அருண் மற்றும் இனியா அருண் ஆகியோர் 100 சதவீதப் பங்குகளை வைத்திருப்பதாக அவர் தெரிவித்துள்ளார்.
அந்த நிறுவனத்தின் முதலீடு ஒரு லட்சம் ரூபாய் மட்டுமே என்றும், நிறுவனம் 65 லட்சம் ரூபாய் நஷ்டத்தில் இருப்பதாகக் கணக்கு காட்டப்பட்டுள்ளதாகவும் அவர் கூறியுள்ளார். அதே நேரத்தில், அந்த நிறுவனத்திற்கு தனிநபர்கள் மூலம் 24 கோடி ரூபாய் கடன் வழங்கப்பட்டுள்ளதாக வருமான வரிக் கணக்குகளில் குறிப்பிடப்பட்டிருப்பதாகவும் சவுக்கு சங்கர் குற்றம்சாட்டியுள்ளார்.
கல்லூரியில் படிக்கும் ஒருவர் மற்றும் பள்ளியில் படிக்கும் ஒருவர் தொடர்புடைய நிறுவனத்திற்கு இவ்வளவு பெரிய தொகை எவ்வாறு கடனாக வழங்கப்பட்டது என்பது குறித்து விசாரணை நடத்த வேண்டும் என்றும் அவர் கேள்வி எழுப்பியுள்ளார்.
இதேபோல், செவன் ஹில்ஸ் பிரைவேட் லிமிடெட் உள்ளிட்ட பத்துக்கும் மேற்பட்ட நிறுவனங்கள் அருணின் பினாமி பெயர்களில் செயல்பட்டு வருவதாகவும் அவர் குற்றம்சாட்டியுள்ளார்.
மனைவி, மகள்கள் மீதும் விசாரணை கோரிக்கை
அருணின் மனைவியும் ஐஆர்எஸ் அதிகாரியுமான யமுனாதேவி மீதும் சவுக்கு சங்கர் பல்வேறு குற்றச்சாட்டுகளை முன்வைத்துள்ளார்.
யமுனாதேவி முக்கியப் பொறுப்புகளில் பணியாற்றி வருவதாகவும், அவரது பதவியைப் பயன்படுத்தி முறைகேடாக சொத்துகள் சேர்க்கப்பட்டுள்ளதா என்பது குறித்து விசாரணை நடத்த வேண்டும் என்றும் அவர் வலியுறுத்தியுள்ளார்.
மேலும், அருண் மற்றும் யமுனாதேவியின் மகள்களான சார்வியா அருண், இனியா அருண் ஆகியோரின் பெயரில் உள்ள சொத்துகள் மற்றும் அவர்கள் தொடர்புடைய நிறுவனங்களின் நிதிப் பரிவர்த்தனைகள் குறித்தும் விரிவான விசாரணை நடத்த வேண்டும் எனக் கோரிக்கை விடுத்துள்ளார்.
அருணின் குடும்பத்தினருடன் தொடர்புடையதாகக் கூறப்படும் மேலும் சில நபர்களின் சொத்துகளையும் ஆய்வு செய்து, அவை சட்டப்பூர்வமாகச் சேர்க்கப்பட்டவையா அல்லது பினாமி சொத்துகளா என்பதை விசாரிக்க வேண்டும் என்றும் அவர் தெரிவித்துள்ளார்.
சிபிஐ உள்ளிட்ட மத்திய அமைப்புகள் விசாரிக்க வேண்டும்
யமுனாதேவி மத்திய அரசு பணியில் உள்ள ஐஆர்எஸ் அதிகாரி என்பதால், இந்த விவகாரத்தில் சிபிஐ, மத்திய நிதித்துறை மற்றும் மத்திய உள்துறை அமைச்சகம் உள்ளிட்ட அமைப்புகளும் தலையிட்டு விசாரணை நடத்த வேண்டும் என சவுக்கு சங்கர் வலியுறுத்தியுள்ளார்.
அருண், யமுனாதேவி மற்றும் அவர்களது மகள்கள் உள்ளிட்டோர் மீது லஞ்ச ஒழிப்புச் சட்டம் மற்றும் சட்டவிரோத பணப்பரிமாற்றத் தடுப்புச் சட்டம் உள்ளிட்ட தொடர்புடைய சட்டங்களின் கீழ் நடவடிக்கை எடுக்க வேண்டும் என்றும் அவர் கோரிக்கை விடுத்துள்ளார்.
மேலும், சம்பந்தப்பட்ட அதிகாரிகள் மீது துறை ரீதியான நடவடிக்கை எடுக்க வேண்டும் என்றும், தேவையான இடங்களில் சொத்துகளை முடக்கி விசாரணை நடத்த வேண்டும் என்றும் அவர் தெரிவித்துள்ளார்.
அருண் ஐபிஎஸ் மீது ஏற்கனவே சட்டப் போராட்டம்
அருண் ஐபிஎஸ் மற்றும் சவுக்கு சங்கர் இடையே கடந்த சில மாதங்களாகவே சட்ட ரீதியான மோதல்கள் தொடர்ந்து வருகின்றன.
முன்னதாக, சென்னை காவல் ஆணையராக அருண் பணியாற்றியபோது, ரியல் எஸ்டேட் தொழிலதிபர் சந்தோஷ் சர்மா என்பவர் குண்டர் தடுப்புச் சட்டத்தின் கீழ் கைது செய்யப்பட்ட விவகாரம் தொடர்பாக சென்னை உயர் நீதிமன்றத்தில் வழக்கு தொடரப்பட்டது.
அந்த வழக்கில் அருண் ஐபிஎஸ் தனது அதிகாரத்தைத் தவறாகப் பயன்படுத்தி உத்தரவு பிறப்பித்ததாக நீதிமன்றம் கண்டனம் தெரிவித்ததாகக் கூறப்படுகிறது. இதனை அடிப்படையாகக் கொண்டு அருண் மீது சிபிஐ விசாரணைக்கு உத்தரவிட வேண்டும் என சவுக்கு சங்கர் சென்னை உயர் நீதிமன்றத்தில் பொதுநல மனுவையும் தாக்கல் செய்திருந்தார்.
எனினும், அந்த மனுவை விசாரித்த நீதிமன்றம், இருவருக்கும் இடையே ஏற்கனவே தனிப்பட்ட மோதல் இருப்பதைச் சுட்டிக்காட்டி, மனுவைத் தள்ளுபடி செய்ததாகத் தெரிவிக்கப்பட்டுள்ளது.
சவுக்கு சங்கர் மீது அவதூறு வழக்கு
இதற்கிடையே, தன் பெயருக்கும் நற்பெயருக்கும் களங்கம் ஏற்படுத்தும் வகையில் சவுக்கு சங்கர் அவதூறாகப் பேசியதாகக் கூறி, அருண் ஐபிஎஸ் தரப்பிலும் சென்னை உயர் நீதிமன்றத்தில் அவதூறு வழக்கு தொடரப்பட்டுள்ளது.
இதனால், இரு தரப்பினருக்கும் இடையிலான சட்டப் போராட்டம் தொடர்ந்து வருகிறது.
புகாரின் மீது நடவடிக்கை கோரிக்கை
தற்போது அளிக்கப்பட்டுள்ள புகாரில் அருண், அவரது மனைவி யமுனாதேவி, மகள்கள் சார்வியா அருண் மற்றும் இனியா அருண் உள்ளிட்டோரின் வருமானம், சொத்துகள், நிறுவனங்கள் மற்றும் நிதிப் பரிவர்த்தனைகள் குறித்து விரிவான விசாரணை நடத்த வேண்டும் என சவுக்கு சங்கர் வலியுறுத்தியுள்ளார்.
மேலும், இந்தப் புகாரின் அடிப்படையில் உரிய விசாரணை நடத்தி, குற்றச்சாட்டுகள் உண்மை என நிரூபிக்கப்பட்டால் சட்டப்படி நடவடிக்கை எடுக்க வேண்டும் என்றும் அவர் தெரிவித்துள்ளார்.
புகார் தொடர்பாக அதிகாரிகள் அரசுக்கு உரிய பரிந்துரைகளை வழங்குவதாகத் தெரிவித்ததாகவும் சவுக்கு சங்கர் கூறியுள்ளார்.
இந்த நிலையில், அருண் ஐபிஎஸ் மற்றும் அவரது குடும்பத்தினர் மீது சவுக்கு சங்கர் முன்வைத்துள்ள குற்றச்சாட்டுகள் தொடர்பாக அதிகாரப்பூர்வ விசாரணை நடைபெறுமா, விசாரணையில் என்ன முடிவுகள் வெளியாகும் என்பது அடுத்தகட்டத்தில் தெரியவரும்.