பிரதமர் நரேந்திர மோடியின் கருத்துக்கு ஆதரவளித்து, தலைமை இமாமும், முக்கிய முஸ்லிம் மதத் தலைவருமான டாக்டர் இமாம் உமர் அகமது இல்யாசி, இளம் போராட்டக்காரர்கள் தங்கள் எதிர்ப்பை வெளிப்படுத்தும் போது நிதானத்தைக் கடைப்பிடிக்கவும், வன்முறையைத் தவிர்க்கவும், வசைச் சொற்களைப் பயன்படுத்துவதைத் தவிர்க்கவும் வலியுறுத்தினார்.
சமீபத்திய இன்ஸ்டாகிராம் பதிவில் பிரதமர் மோடி, நீட் தேர்வு வினாத்தாள் கசிவுக்கு எதிராக கரப்பான்பூச்சி ஜனதா கட்சி நடத்திய போராட்டத்தின் போது, தன்னையும் தனது மறைந்த தாயாரையும் வசைச் சொற்களால் தாக்கிய மாணவர் போராட்டக்காரர்களை மன்னிப்பதாகக் கூறினார். மேலும், “வசைகள் ஒருபோதும் எதையும் தீர்க்காது” என்றும், சட்டரீதியான தண்டனையை விட இளைஞர்களுக்கு வழிகாட்டுவது ஆக்கப்பூர்வமானது என்றும் அவர் குறிப்பிட்டார்.
இந்நிலையில், இமாம் இல்யாசி இதுகுறித்து, ”விவாதம், விமர்சனம், கருத்து வேறுபாடுகளின் மூலம் ஜனநாயகம் செழித்து வளரும் அதே வேளையில், பிரதமர் பதவி தேசத்தைப் பிரதிநிதித்துவப்படுத்துகிறது. அரசியல் வேறுபாடுகளைப் பொருட்படுத்தாமல் அதற்கு கண்ணியமும் மரியாதையும் அளிக்கப்பட வேண்டும். அரசாங்கக் கொள்கைகளை எதிர்ப்பது ஒரு நியாயமான ஜனநாயக உரிமை. ஆனால் நாட்டின் தேர்ந்தெடுக்கப்பட்ட தலைவருக்கு எதிராக அவதூறான அல்லது இழிவான மொழியைப் பயன்படுத்துவது தேசத்தின் கண்ணியத்தைக் குலைக்கிறது.
பகைமையையோ அல்லது மோதலையோ ஊக்குவிக்கும் அரசியல் பிரச்சாரங்களால் ஈர்க்கப்பட வேண்டாம். அதற்குப் பதிலாக, அவர்கள் தங்கள் ஆற்றலை ஆக்கப்பூர்வமான உரையாடல், அமைதியான வாதம் மற்றும் ஜனநாயக ஈடுபாடு ஆகியவற்றில் செலுத்த வேண்டும். ஆத்திரமூட்டும் செயல்கள் அல்லது தரக்குறைவான சொற்களைப் பயன்படுத்துவதன் மூலம் அல்லாமல், நாகரிகமான உரையாடல் மற்றும் வன்முறையற்ற வழிகள் மூலமாகவே நிரந்தரத் தீர்வுகளைக் காண முடியும்” என்றார்.
தேர்வு வினாத்தாள் கசிவு மற்றும் முறைகேடுகளுக்கு எதிராக டெல்லியின் ஜந்தர் மந்தரில் மாணவர்கள் பெரும் போராட்டங்களை நடத்தினர். போராட்டத்தின் போது, ஒரு பெண் மாணவி, பிற போராட்டக்காரர்கள் பிரதமர் மோடி, அவரது மறைந்த தாயார் ஹீராபென் மோடி ஆகியோரை மிக மோசமான, அருவருக்கத்தக்க வார்த்தைகளால் திட்டும் வீடியோ ஒன்று சமூக வலைதளங்களில் பரவியது.
தரக்குறைவான கருத்துகளைத் தெரிவித்தவர்கள் மீது டெல்லி மற்றும் நொய்டா காவல்துறையினர் முதல் தகவல் அறிக்கைகளை பதிவு செய்தனர். வைரலான வீடியோவில் இடம்பெற்ற அந்த மாணவி, தவறாக வழிநடத்தப்பட்டதாகக் கூறி பின்னர் பொதுவெளியில் வீடியோ மூலம் மன்னிப்பு கோரினார்.
சமூக வலைதளங்களில் பகிரப்பட்ட நள்ளிரவு வீடியோ செய்தி ஒன்றில், பிரதமர் மோடி இந்த சர்ச்சை குறித்து நேரடியாகப் பேசினார். போராட்டக்காரர்களை “தவறாக வழிநடத்தப்பட்ட குழந்தைகள்” என்று குறிப்பிட்ட அவர், “நான் அவர்களை மன்னிக்க விரும்புகிறேன். சமூகமும் இதை ஏற்றுக்கொள்ள வேண்டும்” என்று தெளிவாகக் கூறினார். இளம் பெண்கள் இத்தகைய மொழியைப் பயன்படுத்துவதைக் காண்பது ஒரு “கலாச்சார அதிர்ச்சி” என்று அவர் குறிப்பிட்டார்.
அதேவேளையில், நாக்கு மற்றும் பற்களுக்கு இடையிலான உதாரணத்தை அவர் சுட்டிக்காட்டினார். அதாவது, தவறுதலாக நம் நாக்கை நாமே கடித்துக்கொண்டாலும், பற்களை நாம் உடைப்பதில்லை. ஏனெனில் அவை இரண்டுமே நமக்குச் சொந்தமானவை. இளைஞர்களை அரவணைத்து, அவர்களைச் சரியான பாதையில் வழிநடத்தி, நாட்டின் நலனுக்காக ஒன்றிணைந்து செயல்படுமாறு அவர் சமூகத்தை வலியுறுத்தினார்.