ஸ்காட்லாந்தின் கிளாஸ்கோ நகரில் உள்ள OVO Hydro உள்விளையாட்டு அரங்கில் நடைபெற்ற 23-ஆவது காமன்வெல்த் விளையாட்டுப் போட்டிகளின் (Glasgow 2026) பிரம்மாண்ட தொடக்க விழாவில், பிரிட்டன் மன்னர் மூன்றாம் சார்ல்ஸ் மற்றும் ராணி கமில்லா ஆகியோர், Doctor Who தொடரின் புகழ்பெற்ற TARDIS காலப்பயண பெட்டி வடிவ மேடையிலிருந்து தோன்றி போட்டிகளை அதிகாரப்பூர்வமாகத் தொடங்கி வைத்தனர்.
காமன்வெல்த் விளையாட்டுப் போட்டிகளின் வரலாற்றிலேயே முதன்முறையாக முழுமையாக ஒரு உள்விளையாட்டு அரங்கில் (Indoor Arena) தொடக்க விழா நடைபெற்றது. சுமார் 14,000 பார்வையாளர்கள் முன்னிலையில் நடைபெற்ற இவ்விழா, கலை, இசை, தொழில்நுட்பம் மற்றும் ஸ்காட்லாந்தின் பாரம்பரியத்தை இணைத்த வண்ணமயமான நிகழ்வாக அமைந்தது.
விழாவின் தொடக்கத்தில், ஒலிம்பிக் சைக்கிள் பந்தய ஜாம்பவான் சர் கிறிஸ் ஹோய், நடிகர் கிரெக் மெக்ஹியூ மற்றும் Doctor Who தொடரில் 7-ஆவது டாக்டராக நடித்த ஸ்காட்டிஷ் நடிகர் சில்வெஸ்டர் மெக்காய் ஆகியோர் இடம்பெற்ற கற்பனை காணொளி திரையிடப்பட்டது. அதில், டார்டிஸ் காலப்பயண பெட்டி ஸ்காட்லாந்தின் புகழ்பெற்ற லோக் நெஸ், தி கெல்ப்பீஸ் மற்றும் எடின்பர்க் கோட்டை உள்ளிட்ட இடங்களைச் சுற்றி, அரச தம்பதியை அரங்கிற்கு அழைத்து வருவது போன்று காட்சிப்படுத்தப்பட்டது.
50 மீட்டர் அகலமுள்ள பிரம்மாண்ட எல்.இ.டி. திரையில் ஒளிப்பரப்பப்பட்ட இந்தக் காணொளிக்குப் பிறகு, புகைமூட்டத்துடன் மேடையில் தோன்றிய நீல நிற டார்டிஸ் பெட்டியிலிருந்து மன்னர் சார்ல்ஸும் ராணி கமில்லாவும் வெளியே வந்தனர். இதைக் கண்ட பார்வையாளர்கள் எழுந்து நின்று கரவொலி எழுப்பி உற்சாக வரவேற்பு அளித்தனர்.
Doctor Who தொடரின் உருவாக்கத்திலும் வளர்ச்சியிலும் ஸ்காட்லாந்தைச் சேர்ந்த கலைஞர்கள் மற்றும் நடிகர்கள் முக்கிய பங்கு வகித்திருப்பதால், தொடக்க விழாவிற்கு டார்டிஸ் கருப்பொருள் தேர்வு செய்யப்பட்டதாக ஏற்பாட்டாளர்கள் தெரிவித்தனர்.
இந்த பிரம்மாண்ட நுழைவு, 2012 லண்டன் ஒலிம்பிக் தொடக்க விழாவில் மறைந்த இரண்டாம் எலிசபெத் மகாராணியும், ஜேம்ஸ் பாண்ட் கதாபாத்திரமும் ஹெலிகாப்டரிலிருந்து குதிப்பது போல் வடிவமைக்கப்பட்ட உலகப் புகழ்பெற்ற நிகழ்வை பலருக்கும் நினைவூட்டியது.
விழாவின் மற்றொரு சிறப்பம்சமாக, Outlander தொடரின் நடிகர் சாம் ஹியூஹன், ஸ்காட்லாந்தின் நாட்டுப்புறக் கதைகளில் இடம்பெறும் புகழ்பெற்ற நீர்வாழ் கற்பனை உயிரினமான லோக் நெஸ் மான்ஸ்டர் (நெஸ்ஸி) வடிவத்தை மேடைக்கு அறிமுகப்படுத்தினார். அப்போது பாரம்பரிய ஸ்காட்டிஷ் பைப் பேண்ட் இசைக்குழுவினர் Flower of Scotland பாடலை இசைத்து அரங்கத்தை உணர்ச்சிப்பூர்வமான சூழலாக்கினர்.
இதைத் தொடர்ந்து ஸ்காட்லாந்தின் முன்னணி இசைக் கலைஞர்களான KT Tunstall, Tom Walker, Nina Nesbitt மற்றும் மின்னணு-நாட்டுப்புற இசைக்குழுவான Valtos ஆகியோர் தங்களது இசை நிகழ்ச்சிகளால் ரசிகர்களை உற்சாகப்படுத்தினர்.
கடந்த 2025 மார்ச் மாதம் பக்கிங்ஹாம் அரண்மனையிலிருந்து 500 நாட்கள் பயணத்தைத் தொடங்கிய King’s Baton விழாவில் அரங்கிற்கு கொண்டு வரப்பட்டது. அதிலிருந்த மன்னரின் கடிதத்தை சார்ல்ஸ் வாசித்தார். அதில், கடல்வாழ் உயிரினங்களுக்கு பெரும் அச்சுறுத்தலாக இருக்கும் நெகிழி (Plastic) மாசுபாட்டை ஒழிக்க உலக நாடுகள் ஒன்றிணைந்து செயல்பட வேண்டும் என்ற விழிப்புணர்வு செய்தி இடம்பெற்றிருந்தது.
விழாவின் முக்கிய நிகழ்வான அணிவகுப்பில், இந்திய அணிக்கு டோக்கியோ ஒலிம்பிக் பளுதூக்குதல் வெள்ளிப் பதக்க வீராங்கனை மீராபாய் சானு தேசியக் கொடியை ஏந்தி தலைமை தாங்கினார். அவருடன் உலக சாம்பியன் குத்துச்சண்டை வீராங்கனை லவ்லினா போர்கோஹெய்ன் King’s Baton-ஐ ஏந்திச் சென்றார்.
இந்தியாவிற்கு போட்டி தொடங்குவதற்குமுன்பே ஒரு நற்செய்தியும் கிடைத்தது. பெண்கள் 75 கிலோ எடைப்பிரிவு குத்துச்சண்டையில் வெறும் ஐந்து வீராங்கனைகள் மட்டுமே பங்கேற்பதால், லவ்லினா போர்கோஹெய்ன் முதல் சுற்றில் ‘பை’ (Bye) பெற்று நேரடியாக அரையிறுதிக்கு முன்னேறியுள்ளார். இதன் மூலம் இந்தியாவிற்கு குறைந்தபட்சம் ஒரு பதக்க வாய்ப்பு உறுதி செய்யப்பட்டுள்ளது.
இந்த ஆண்டு நிதி நெருக்கடி காரணமாக காமன்வெல்த் போட்டிகளில் இடம்பெறும் விளையாட்டுப் பிரிவுகள் 10 ஆகக் குறைக்கப்பட்டுள்ளன. இருப்பினும், மாற்றுத்திறனாளி வீரர்களுக்கான பாரா-விளையாட்டுப் பிரிவில் சாதனை அளவாக 47 பதக்கப் போட்டிகள் இடம்பெற்றுள்ளன.
மேலும், காமன்வெல்த் விளையாட்டுப் போட்டிகளின் வரலாற்றில் முதன்முறையாக, கலை நிகழ்ச்சிகள் தொடங்குவதற்கு முன்பே அனைத்து நாடுகளின் வீரர், வீராங்கனைகளும் அரங்கிற்குள் அமர்ந்து முழு தொடக்க விழாவையும் கண்டு ரசிக்கும் வகையில் ஏற்பாடுகள் செய்யப்பட்டிருந்தன.
74 நாடுகள் மற்றும் பிரதேசங்களைச் சேர்ந்த 3,000-க்கும் மேற்பட்ட வீரர், வீராங்கனைகள் பங்கேற்கும் கிளாஸ்கோ 2026 காமன்வெல்த் விளையாட்டுப் போட்டிகள் ஆகஸ்ட் 2, 2026 வரை நடைபெற உள்ளன.