2031-ஆம் ஆண்டிற்குள் செயற்கை நுண்ணறிவு எனப்படும் AI தொழில்நுட்பம், உலகளாவிய வேலைவாய்ப்பு சந்தையில் மிகப்பெரிய மாற்றத்தை ஏற்படுத்தும் என உலகளாவிய பொருளாதார வல்லுநர்கள் மற்றும் தொழில்நுட்ப நிபுணர்கள் கணித்துள்ளனர்.
எதிர்காலத்தில் லட்சக்கணக்கான வேலைவாய்ப்புகள் உருவாகும் நிலையில், அந்தப் பணிகளைச் செய்வதற்குத் தேவையான திறன் வாய்ந்த மனிதவளம் போதுமான அளவில் இல்லாத சூழல் உருவாகக்கூடும் என ஆய்வுகள் தெரிவிக்கின்றன.
தரவுகளை உள்ளீடு செய்தல், வாடிக்கையாளர் சேவை, அடிப்படை கணக்குப் பணிகள் உள்ளிட்ட வழக்கமான மற்றும் மீண்டும் மீண்டும் செய்யப்படும் பணிகளில் AI-ன் பயன்பாடு அதிகரிக்க உள்ளது. அதேநேரத்தில், AI பிராம்ப்ட் இன்ஜினியர்கள், தரவு அறிவியலாளர்கள், AI பொறியாளர்கள், தரவு பொறியாளர்கள், தரவு ஆய்வாளர்கள் மற்றும் AI நன்னெறி நிபுணர்கள் உள்ளிட்ட புதிய பணிகளுக்கான தேவை அதிகரிக்கும் என எதிர்பார்க்கப்படுகிறது.
இந்தியாவில் AI மற்றும் தரவுத்துறையில் திறன் வாய்ந்த பணியாளர்களுக்கான தேவை தொடர்ந்து அதிகரித்து வரும் நிலையில், 2031-ஆம் ஆண்டில் 2,29,665 பணியாளர்கள் பற்றாக்குறை ஏற்படக்கூடும் என இந்தியாவின் முன்னணி ஆள் சேர்ப்பு மற்றும் மனிதவள நிறுவனமான குவஸ் கார்ப் வெளியிட்டுள்ள வேலைவாய்ப்பு ஆய்வறிக்கையில் தெரிவிக்கப்பட்டுள்ளது.
AI மற்றும் தரவுத்துறையில் ஆண்டுதோறும் சுமார் ஒரு லட்சம் பேர் படிப்பை முடித்து வேலைவாய்ப்பு சந்தைக்கு வருகின்றனர். ஆனால், தொழில் நிறுவனங்களின் ஆண்டு பணியாளர் தேவை சுமார் இரண்டு லட்சமாக இருப்பதாக ஆய்வில் குறிப்பிடப்பட்டுள்ளது.
இதனால் தற்போதே தேவைக்கும், அதற்கேற்ப கிடைக்கும் திறன் வாய்ந்த பணியாளர்களுக்கும் இடையே குறிப்பிடத்தக்க இடைவெளி காணப்படுகிறது. இந்த இடைவெளி வரும் ஆண்டுகளில் மேலும் அதிகரித்து, 2031-ல் 2,29,665 பணியாளர்கள் பற்றாக்குறையாக மாறக்கூடும் என கணிக்கப்பட்டுள்ளது.
மேலும், இந்தியாவில் ஜெனரேட்டிவ் AI மற்றும் கிளவுட் கம்ப்யூட்டிங் துறைகளில் 53 முதல் 60 சதவீதம் வரை திறன் வாய்ந்த பணியாளர்கள் பற்றாக்குறை நிலவுவதாகவும், தகவல் தொழில்நுட்பத் துறையில் சுமார் 16 சதவீதம் பேருக்கு மட்டுமே AI திறன்கள் உள்ளதாகவும் ஆய்வுகள் தெரிவிக்கின்றன. இந்த திறன் இடைவெளி காரணமாக, வேலைவாய்ப்புகள் உருவாகும் அளவுக்கு தகுதியான மனிதவளம் கிடைப்பதில் சவால் ஏற்படுகிறது. குறிப்பாக, ஆரம்பக்கட்ட வேலைவாய்ப்புகளும் சுருங்கி வருவதாக தெரிவிக்கப்பட்டுள்ளது.
AI தொழில்நுட்ப வளர்ச்சிக்கு ஏற்ப தற்போதைய ஊழியர்கள் தங்களது திறன்களை மேம்படுத்திக் கொள்வதும், புதிய திறன்களை கற்றுக்கொள்வதும் அவசியமாகிறது. இதனை மறுதிறன் மேம்பாடு மற்றும் திறன் மேம்பாடு எனக் குறிப்பிடுகின்றனர். AI கருவிகளைப் பயன்படுத்தத் தெரிந்தவர்கள் மட்டுமின்றி, மனித உணர்வுகள், படைப்பாற்றல், தலைமைத்துவம் உள்ளிட்ட மனிதர்களின் தனித்துவமான திறன்கள் தேவைப்படும் பணிகளுக்கும் எதிர்காலத்தில் தொடர்ந்து தேவை இருக்கும் என நிபுணர்கள் தெரிவிக்கின்றனர்.
எதிர்கால வேலைவாய்ப்பு சந்தையில் AI-ஐ மனிதர்களுக்கு மாற்றாகக் கருதுவதற்குப் பதிலாக, ஒரு கருவியாகப் பயன்படுத்தி அதனுடன் இணைந்து பணியாற்றும் திறன் முக்கியத்துவம் பெறும். குறிப்பாக தகவல் தொழில்நுட்பம் மற்றும் மென்பொருள் துறையில் கோடிங் முதல் மென்பொருள் சோதனை வரை பல்வேறு பணிகளில் AI-ன் ஆதிக்கம் அதிகரிக்க உள்ளது.
கல்வி மற்றும் மருத்துவத் துறைகளிலும் AI முக்கிய பங்கு வகிக்க உள்ளது. மாணவர்களின் தேவைக்கேற்ப தனிப்பயனாக்கப்பட்ட கல்வியை வழங்குவதிலும், நோய்களைக் கண்டறிவதில் மருத்துவர்களுக்கு உதவும் கருவியாகவும் AI பயன்படுத்தப்பட உள்ளது. உற்பத்தி மற்றும் சரக்கு போக்குவரத்துத் துறைகளில் ரோபாட்டிக்ஸ் மற்றும் AI இணைந்து செயல்படுவதன் மூலம் உற்பத்தி மற்றும் செயல்திறனில் பெரிய மாற்றங்கள் ஏற்படக்கூடும்.
AI மற்றும் தரவுத்துறையைத் தவிர, இணையப் பாதுகாப்பு, தகவல் தொழில்நுட்பம், உற்பத்தி, கட்டுமானம், சுகாதாரம், திறன் சார்ந்த தொழில்கள், மின்சார வாகனங்கள் மற்றும் புதுப்பிக்கத்தக்க எரிசக்தி உள்ளிட்ட பல்வேறு துறைகளிலும் எதிர்காலத்தில் திறன் வாய்ந்த பணியாளர்களுக்கான தேவை அதிகரிக்கும் என குவஸ் கார்ப் ஆய்வில் தெரிவிக்கப்பட்டுள்ளது.
எனவே, AI தொழில்நுட்பத்தின் பயன்பாடு பல்வேறு துறைகளில் வேகமாக விரிவடைந்து வரும் நிலையில், அதற்கேற்ப கல்வி மற்றும் தொழிற்பயிற்சி முறைகளை மாற்றியமைத்து, தேவையான தொழில்நுட்பத் திறன்களைக் கொண்ட மனிதவளத்தை உருவாக்குவது முக்கியம் என ஆய்வறிக்கை வலியுறுத்துகிறது.
மொத்தத்தில், 2031-ஆம் ஆண்டில் AI மற்றும் தரவுத்துறையில் வேலைவாய்ப்புகள் அதிகரிக்கும் அதேவேளையில், அந்தப் பணிகளுக்குத் தேவையான திறன் வாய்ந்த பணியாளர்களை உருவாக்குவது இந்தியாவுக்கு மிகப்பெரிய சவாலாக இருக்கும் என குவஸ் கார்ப் ஆய்வு சுட்டிக்காட்டுகிறது.