திருச்சியில் முன்னாள் பள்ளிக் கல்வித் துறை அமைச்சர் அன்பில் மகேஸின் வீட்டில் மத்திய குற்றப்பிரிவு (CCB) போலீசார் திடீர் சோதனை நடத்தினர். இன்று காலை தொடங்கிய இந்தச் சோதனை, சுமார் 8 மணி நேரத்திற்கும் மேலாக நடைபெற்றது.
சென்னை மற்றும் திருச்சியில் அன்பில் மகேஸின் வீடு, அலுவலகம் மற்றும் அவரது உதவியாளர் வாளாடி கார்த்திக்குடன் தொடர்புடைய இடங்கள் என மொத்தம் 6 இடங்களில் ஒரே நேரத்தில் சோதனை நடைபெற்றதாகத் தெரிவிக்கப்பட்டுள்ளது.
சோதனை நிறைவடைந்ததைத் தொடர்ந்து செய்தியாளர்களைச் சந்தித்த அன்பில் மகேஸ், இந்த நடவடிக்கை குறித்து பல்வேறு குற்றச்சாட்டுகளை முன்வைத்தார். தமிழக வெற்றிக் கழக அரசைத் தொடர்ந்து விமர்சித்து வந்ததன் காரணமாகவே இந்தச் சோதனை நடத்தப்பட்டதாக அவர் குற்றம்சாட்டினார். மேலும், தவெக தலைவரும் தமிழக முதலமைச்சருமான விஜய்யை, “ஹிட்லர் முதல்வர்” எனக் கடுமையாக விமர்சித்தார்.
அரசியல் மடைமாற்றத்திற்காகவும், பழிவாங்கும் நோக்கத்துடனும் இந்தச் சோதனை நடத்தப்பட்டுள்ளதாக அன்பில் மகேஸ் தெரிவித்தார். வீட்டின் அனைத்து அறைகளையும், ஆவணங்களையும் சோதனையிட போலீசாருக்கு முழு ஒத்துழைப்பு வழங்கியதாகக் கூறிய அவர், சில முக்கியக் கோப்புகளை அதிகாரிகள் எடுத்துச் சென்றுள்ளதாகவும் தெரிவித்தார்.
தமிழ்நாடு தனியார் பள்ளிகள் கூட்டமைப்பின் செயலாளர் இளங்கோவன், சென்னை மாநகர காவல் ஆணையரிடம் அளித்த புகாரின் அடிப்படையில் இந்த நடவடிக்கை மேற்கொள்ளப்பட்டதாகக் கூறப்படுகிறது. கடந்த திமுக ஆட்சிக் காலத்தில் அன்பில் மகேஸ் பள்ளிக் கல்வித் துறை அமைச்சராக இருந்தபோது, தனியார் பள்ளிகளுக்கு நிரந்தர அங்கீகாரம், தரம் உயர்த்துதல் மற்றும் DTCP ஒப்புதல் உள்ளிட்ட அரசு அனுமதிகளைப் பெற்றுத் தருவதாகக் கூறி, 177 தனியார் பள்ளிகளிடம் பல கோடி ரூபாய் வசூலித்து மோசடி செய்ததாக முதற்கட்ட விசாரணையில் தெரியவந்துள்ளதாக போலீசார் தெரிவித்துள்ளனர்.
இந்த வழக்கில் முக்கியக் குற்றவாளியாகக் கருதப்படும், பதிவு செய்யப்படாத தமிழ்நாடு தனியார் பள்ளிகள் சங்கத்தைச் சேர்ந்த பி.டி. அரசகுமார், கடந்த ஜூன் மாதம் கைது செய்யப்பட்டார். தற்போது அவர் குண்டர் தடுப்புச் சட்டத்தின் கீழ் சிறையில் அடைக்கப்பட்டுள்ளார். இவருடன் சேர்த்து இதுவரை மொத்தம் 3 பேர் கைது செய்யப்பட்டுள்ளனர்.
இந்த வழக்கில் தொடர்புடையவர்களின் குடும்பத்தினரின் வங்கிக் கணக்குகள் உள்ளிட்ட சுமார் 49 வங்கிக் கணக்குகள் முடக்கப்பட்டு, நிதிப் பரிவர்த்தனைகள் கண்காணிக்கப்பட்டு வருவதாகவும் தெரிவிக்கப்பட்டுள்ளது.
திருச்சி தென்னூர் அண்ணா நகரில் உள்ள அன்பில் மகேஸின் வீட்டின் முன்பு ஏராளமான திமுக தொண்டர்கள் திரண்டனர். அவர்கள் தவெக அரசுக்கு எதிராக முழக்கங்களை எழுப்பியதால் அப்பகுதியில் பதற்றம் நிலவியது. அங்கு வந்த முன்னாள் அமைச்சர் கே.என். நேரு, அன்பில் மகேஸை நேரில் சந்திக்க முயன்றார். பின்னர் தொண்டர்களை அன்பில் மகேஸ் அமைதிப்படுத்தினார்.
சோதனை நடைபெற்றுக் கொண்டிருந்தபோது, வெளியூர்களிலிருந்தும் நூற்றுக்கணக்கான திமுக தொண்டர்கள் திரண்டனர். பதற்றம் அதிகரித்த நிலையில், அன்பில் மகேஸ் வீட்டின் பால்கனிக்கு வந்து ‘தம்ஸ் அப்’ மற்றும் ‘தம்ஸ் டவுன்’ சைகைகளைக் காட்டினார். மேலும், தொண்டர்கள் அமைதியாக இருக்க வேண்டும் என்றும், சட்டம்-ஒழுங்கு பிரச்சினை ஏற்படாமல் கலைந்து செல்ல வேண்டும் என்றும் கேட்டுக்கொண்டார்.
மத்திய குற்றப்பிரிவு போலீசார், செப்டம்பர் 18-ம் தேதி நேரில் ஆஜராகுமாறு தனக்குச் சம்மன் அனுப்பியிருப்பதை அன்பில் மகேஸ் உறுதிப்படுத்தினார். அப்போது பேசிய அவர், “செப்டம்பர் 18-ம் தேதி அவர்கள் கேட்கும் கேள்விகளுக்கு தைரியமாகப் பதில் அளித்துவிட்டு, அங்கிருந்து நேராக தாராபுரம் தொகுதி இடைத்தேர்தல் பிரச்சாரத்திற்குச் செல்வேன். அங்கு திமுகவின் வெற்றியை நிலைநாட்டி, தவெக அரசுக்குப் பதில் சொல்வோம்” எனத் தெரிவித்தார்.
மேலும், “எனக்கு மடியில் கனமில்லை; அதனால் வழியில் பயமில்லை. அரசியல் காழ்ப்புணர்ச்சியோடு தவெக அரசு இந்த நடவடிக்கையை மேற்கொள்கிறது. இதற்குப் பின்னால் யார் யார் இருக்கிறார்கள் என்பது குறித்த முழு விவரமும் எனக்குத் தெரியும்” என அன்பில் மகேஸ் கூறினார்.
தவெக அரசு, தமிழக அரசின் கஜானா காலியாக இருப்பதாகக் கூறிவிட்டு, 1,200 கோடி ரூபாய் செலவில் புதிய தலைமைச் செயலகம் கட்டுவது ஏன் என அண்மையில் கேள்வி எழுப்பியிருந்ததாக அன்பில் மகேஸ் தெரிவித்தார். அந்தக் கேள்விக்குப் பழிவாங்கும் நோக்கத்திலேயே தற்போது சோதனை நடத்தப்பட்டுள்ளதாக அவர் குற்றம்சாட்டினார்.
மத்திய குற்றப்பிரிவு அதிகாரிகள் தரப்பில், தனியார் பள்ளி மோசடி வழக்கில் ஏற்கெனவே கைது செய்யப்பட்டுள்ள பி.டி. அரசகுமாரிடம் பெறப்பட்ட வாக்குமூலங்களின் அடிப்படையிலேயே இந்தச் சோதனை நடத்தப்பட்டதாகத் தெரிவிக்கப்பட்டுள்ளது.
இன்றைய சோதனையில் அன்பில் மகேஸின் வீட்டிலிருந்து முக்கியமான கணினி டிஸ்ப்ளேக்கள், ஹார்டு டிஸ்க்குகள் மற்றும் சில அரசு கோப்புகள் பறிமுதல் செய்யப்பட்டுள்ளதாகத் தகவல்கள் வெளியாகியுள்ளன. இவற்றின் அடிப்படையில் செப்டம்பர் 18-ம் தேதி நடைபெற உள்ள விசாரணையை முன்னெடுக்க போலீசார் திட்டமிட்டுள்ளதாகவும் கூறப்படுகிறது.
அன்பில் மகேஸின் நெருங்கிய உதவியாளரான வாளாடி கார்த்திக்கின் வீட்டிலும் தீவிர சோதனை நடைபெற்றது. தனியார் பள்ளிகளிடம் பணம் வசூலிக்கப்பட்டதாகக் கூறப்படும் விவகாரத்தில், நிதிப் பரிவர்த்தனைகளைக் கையாள்வதில் கார்த்திக்கிற்கு முக்கியப் பங்கு இருக்கலாம் என போலீசார் சந்தேகிப்பதாகத் தெரிவிக்கப்பட்டுள்ளது. அவரிடம் இருந்து கைப்பற்றப்பட்டதாகக் கூறப்படும் டைரிகள் மற்றும் மொபைல் எண்கள், இந்த வழக்கின் அடுத்தகட்ட விசாரணைக்கு உதவக்கூடும் என எதிர்பார்க்கப்படுகிறது.
கடந்த 2024-ம் ஆண்டு டிசம்பர் மாதம் நடைபெற்ற தனியார் பள்ளிகள் சங்கத் தொடக்க விழாவில், அப்போதைய அமைச்சராக இருந்த அன்பில் மகேஸ் மற்றும் கல்வித் துறை உயர் அதிகாரிகள் கலந்துகொண்டதாக போலீஸ் விசாரணையில் சுட்டிக்காட்டப்பட்டுள்ளதாகத் தகவல்கள் தெரிவிக்கின்றன.
அந்த நிகழ்ச்சிக்குப் பின்னரே பள்ளிகளுக்கான அங்கீகாரப் பணிகள் தொடர்பாகப் பல கோடி ரூபாய் கைமாறியதாகக் குற்றச்சாட்டுகள் எழுந்துள்ளதாகவும் கூறப்படுகிறது.
அன்பில் மகேஸ் செப்டம்பர் 18-ம் தேதி நேரில் ஆஜராக CCB போலீசார் சம்மன் அனுப்பியுள்ள நிலையில், அவரை சட்டரீதியாக எவ்வாறு எதிர்கொள்வது என்பது குறித்து தவெக அரசின் காவல் துறை உயர் அதிகாரிகள் இன்று மாலை அவசர ஆலோசனையில் ஈடுபட்டுள்ளதாகத் தகவல்கள் வெளியாகியுள்ளன.
அன்பில் மகேஸ் வீட்டிலிருந்து கைப்பற்றப்பட்டதாகக் கூறப்படும் டிஜிட்டல் ஆவணங்கள் மற்றும் 177 தனியார் பள்ளிகள் அளித்த புகார்களை ஒன்றாகத் தொகுத்து, அவரிடம் அடுக்கடுக்கான கேள்விகளைக் கேட்பதற்காக போலீசார் தனி கேள்விப் பட்டியலைத் தயாரித்து வருவதாகவும் கூறப்படுகிறது.
மத்திய குற்றப்பிரிவு போலீசாரின் இந்த நடவடிக்கை, திமுக மற்றும் தமிழக வெற்றிக் கழகம் இடையேயான அரசியல் மோதலை மேலும் தீவிரப்படுத்தியுள்ளது.