கூகுள் நிறுவனம் ‘Expert Intelligence’ என்ற புதிய AI அம்சத்தை அறிமுகப்படுத்தியுள்ளது. இதன் மூலம், பயனர்கள் Google Play Books தளத்தில் தாங்கள் வாங்கிய தகுதியுள்ள மின் புத்தகங்களை Gemini Notebook-ல், அதாவது முன்பு NotebookLM என அழைக்கப்பட்ட தளத்தில், ஆதாரமாக இணைத்துக்கொள்ள முடியும். பின்னர் அந்தப் புத்தகத்தின் உள்ளடக்கத்தை அடிப்படையாகக் கொண்டு AI-யிடம் கேள்விகள் கேட்டு, தனிப்பயனாக்கப்பட்ட பதில்களையும் நுண்ணறிவுகளையும் பெறலாம்.
இந்த வசதியின் மூலம், மின் புத்தகங்களை வெறும் வாசிப்பதோடு நின்றுவிடாமல், புத்தகங்களுடன் AI வழியாக உரையாட முடியும். புத்தகத்தில் உள்ள குறிப்பிட்ட தகவல்களைத் தேடுவது, கேள்விகளுக்குப் பதில் பெறுவது, ஒரு கருத்தை எளிமையாகப் புரிந்துகொள்வது போன்றவற்றை AI மூலம் மேற்கொள்ளலாம்.
மேலும், புத்தகங்களின் உள்ளடக்கத்தை அடிப்படையாகக் கொண்டு வினாடி வினாக்கள், ஃபிளாஷ் கார்டுகள், ஆடியோ தொகுப்புகள் மற்றும் தகவல் வரைபடங்களையும் உருவாக்கிக்கொள்ள முடியும்.
பயனர்கள் தங்களது Google Drive-ல் சேமித்து வைத்துள்ள சொந்தக் குறிப்புகளையும், மின் புத்தகங்களையும் ஒரே Gemini Notebook-ல் இணைக்கலாம். இதன் மூலம், புத்தகத்தில் உள்ள கருத்துகளை தங்களது குறிப்புகளுடன் ஒப்பிட்டுப் பார்த்து, மேலும் தனிப்பயனாக்கப்பட்ட நுண்ணறிவுகளைப் பெற முடியும். மேலும், Gemini Notebook-ல் புத்தகத்தை ஆதாரமாக இணைத்த பிறகு, அதன் முழு உரையையும் நேரடியாக வாசிக்கும் வசதியும் உள்ளது.
பதிப்பகங்கள் மற்றும் முன்னணி எழுத்தாளர்களுடன் இணைந்து, கூகுள் நிறுவனம் முதற்கட்டமாக 1,00,000-க்கும் மேற்பட்ட மின் புத்தகங்களுக்கு இந்த வசதியை வழங்கியுள்ளது. ஸ்டீவன் பிங்கர், மைக்கேல் பொல்லன் உள்ளிட்ட எழுத்தாளர்களின் படைப்புகளும் இதில் அடங்கும். உங்கள் Google Play Books கணக்கில் உள்ள ஒரு புத்தகம் இதற்குத் தகுதியானதா என்பதை, அதன் விவரப் பக்கத்தில் இருக்கும் ‘Tools’ பேட்ஜ் மூலம் சரிபார்த்துக்கொள்ளலாம்.
இந்த தொழில்நுட்பத்தைப் பயனர்கள் சோதித்துப் பார்ப்பதற்காக, அமெரிக்காவில் தேர்ந்தெடுக்கப்பட்ட சில பயனர்களுக்கு கூகுள் நிறுவனம் இலவச மின் புத்தகங்களையும் விளம்பரச் சலுகையாக வழங்கி வருகிறது. இதில் சார்லஸ் டுஹிக்கின் ‘The Power of Habit’, ஜேம்ஸ் நெஸ்டரின் ‘Breath’, ஸ்டீவன் பிங்கரின் ‘The Sense of Style’, மைக்கேல் பொல்லனின் ‘Food Rules’ மற்றும் கிம் ஸ்காட்டின் ‘Radical Candor’ ஆகியவை இடம்பெற்றுள்ளன.
இந்த வசதி அன்றாட வாழ்க்கையிலும் பல்வேறு வகையில் பயன்படும் என கூகுள் தெரிவித்துள்ளது. உதாரணமாக, வீட்டில் உள்ள காய்கறிகளைப் புகைப்படம் எடுத்து, மைக்கேல் பொல்லனின் ‘Food Rules’ புத்தகத்தில் உள்ள விதிகளின் அடிப்படையில் ஆரோக்கியமான உணவுத் திட்டத்தைத் தயாரிக்குமாறு AI-யிடம் கேட்கலாம்.
அதேபோல், மேலாளர்கள் கிம் ஸ்காட்டின் ‘Radical Candor’ புத்தகத்தை ஆதாரமாகக் கொண்டு, ஊழியர்களுடன் கடினமான உரையாடல்களை எவ்வாறு கையாள்வது அல்லது சிறந்த பின்னூட்டத்தை எவ்வாறு வழங்குவது என்பது குறித்து ஆலோசனைகளைப் பெறலாம்.
உடல்நலம் தொடர்பான புத்தகங்களையும் இதே முறையில் பயன்படுத்த முடியும். உதாரணமாக, ஒருவர் தனது தனிப்பட்ட உடல்நலக் குறிப்புகளைப் பதிவேற்றி, டாக்டர் மேரி கிளேர் ஹேவரின் ‘The New Menopause’ புத்தகத்தில் உள்ள தகவல்கள் தனது சூழலுக்கு எவ்வாறு பொருந்துகின்றன என்பதை AI மூலம் ஒப்பிட்டுப் பார்க்க முடியும். இருப்பினும், இதுபோன்ற AI பகுப்பாய்வை மருத்துவ ஆலோசனைக்கு மாற்றாகக் கருதக்கூடாது.
‘Expert Intelligence’ மூலம் ஒரு புத்தகத்துடன் உரையாட வேண்டுமென்றால், அந்தப் புத்தகத்தை பயனர் Google Play Books தளத்தில் சொந்தமாக வாங்கியிருக்க வேண்டும். AI நோட்புக்கை மற்றொருவருடன் பகிர்ந்துகொண்டாலும், அவரிடம் அந்தப் புத்தகம் இல்லையென்றால், புத்தகத்தின் பாதுகாக்கப்பட்ட உள்ளடக்கத்தை அவரால் அணுக முடியாது. புத்தகத்தைப் படிக்க விரும்பினால், Google Play Books தளத்தில் சொந்தமாக வாங்குமாறு AI அவருக்கு அறிவுறுத்தும். இதன் மூலம் எழுத்தாளர்கள் மற்றும் பதிப்பகங்களின் பதிப்புரிமை பாதுகாக்கப்படுகிறது.
வாங்கிய புத்தகங்களை சுவாரசியமான ஆடியோ வடிவமாக மாற்றும் வசதியும் இதில் உள்ளது. புத்தகத்தின் முக்கியக் கருத்துகளை அடிப்படையாகக் கொண்டு, இரண்டு AI தொகுப்பாளர்கள் தங்களுக்குள் விவாதிப்பது போன்ற ‘Audio Overviews’ ஆடியோவை உருவாக்க முடியும். இதனைப் பயணங்களின்போது அல்லது புத்தகத்தைப் படிக்க நேரமில்லாத நேரங்களில் கேட்கலாம்.
தற்போது இந்த வசதி Google Play Books மற்றும் Gemini Notebook ஆகியவற்றில் தொடங்கப்பட்டுள்ளது. மேலும், தற்போது ஆங்கில மின் புத்தகங்களுக்கு மட்டுமே இந்த வசதி வழங்கப்படுகிறது. எதிர்காலத்தில் பிற மொழிகளுக்கும் இதை விரிவுபடுத்த கூகுள் திட்டமிட்டுள்ளது.
இதுதவிர, முன்னணி பதிப்பகங்களின் இதழ்கள், ஆய்வுக் கட்டுரைகள் மற்றும் நிபுணர்களின் உள்ளடக்கங்களையும் இதில் இணைக்கத் திட்டமிடப்பட்டுள்ளது. பின்னர் ‘Expert Intelligence’ வசதி Gemini App மற்றும் Google Search-ன் AI Mode ஆகியவற்றிலும் ஒருங்கிணைக்கப்படும் என கூகுள் தெரிவித்துள்ளது.
‘Radical Candor’ நூலின் ஆசிரியர் கிம் ஸ்காட், இந்தத் தொழில்நுட்பத்தின் செயல்முறை விளக்கத்தில் கலந்துகொண்டு, வாசகர்கள் தங்களுக்குத் தேவையான தகவல்களையும் குறிப்பிட்ட பகுதிகளையும் பெறுவதற்காக இனி புத்தகத்தின் பக்கங்களைத் தேடி கைமுறையாகப் புரட்ட வேண்டிய அவசியம் குறையும் என்றும், AI மூலம் புத்தகத்தைத் தேடுவது வாசிப்பு அனுபவத்தையும் புத்தகத்துடனான ஈடுபாட்டையும் அதிகரிக்கும் என்றும் தெரிவித்தார்.
AI நிறுவனங்கள் தங்களது அனுமதியின்றி புத்தகங்களைப் பயன்படுத்துவதாகப் பதிப்பகங்கள் தொடர்ந்து குற்றம்சாட்டி வரும் நிலையில், கூகுளின் இந்த அணுகுமுறை மாறுபட்டதாக உள்ளது. Bloomsbury US-ன் தலைவர் சப்ரினா மெக்கார்த்தியின் கூற்றுப்படி, இந்த AI வசதி எழுத்தாளர்களின் படைப்புகளுக்கான அங்கீகாரத்தையும் விற்பனையையும் அதிகரிக்க உதவும் வகையில் சோதிக்கப்பட்டு வருகிறது.
இதன் மூலம், AI தொழில்நுட்பம் புத்தகங்களைப் புரிந்துகொள்வதற்கான கருவியாக மட்டுமின்றி, வாசகர்களை புத்தகங்களுடன் மேலும் இணைத்து, எழுத்தாளர்கள் மற்றும் பதிப்பகங்களின் விற்பனையையும் அதிகரிக்கக்கூடிய புதிய வாய்ப்பாக மாறியுள்ளது.