பாடகியும் ஆன்மீக குணப்படுத்துபவருமான கெனிஷா பிரான்சிஸ், நீண்ட இடைவெளிக்குப் பிறகு மீண்டும் தனது இன்ஸ்டாகிராம் பக்கத்தில் கம்பேக் கொடுத்துள்ளார். நடிகர் ரவி மோகனின் விவாகரத்து சர்ச்சையில் தனது பெயர் தொடர்புபடுத்தப்பட்டதைத் தொடர்ந்து கடந்த மே மாதம் சமூக வலைதளங்களில் இருந்து விலகுவதாக அறிவித்திருந்த அவர், தற்போது அனைத்து சர்ச்சைகளுக்கும் முற்றுப்புள்ளி வைக்கும் வகையில் புதிய தொடக்கத்துடன் மீண்டும் சமூக வலைதளங்களில் தனது பயணத்தைத் தொடங்கியுள்ளார்.
இன்ஸ்டாகிராமில் புதிய பதிவை வெளியிட்டுள்ள கெனிஷா பிரான்சிஸ், “எப்போதுமே மிகவும் முக்கியமான விஷயங்களால் இந்த இடத்தை நிரப்பி வைப்பேன்” என்று குறிப்பிட்டுள்ளார். மேலும், “நாளை நாம் மீண்டும் தொடங்குவோம்” என்ற வாசகத்துடன் தனது புதிய பயணத்தை அறிவித்துள்ளார். அவரது இந்த கம்பேக் பதிவுக்கு ரசிகர்கள் மட்டுமின்றி, திரைத்துறையைச் சேர்ந்த பலரும் வாழ்த்துகளையும் ஆதரவையும் தெரிவித்து வருகின்றனர்.
சமூக வலைதளங்களுக்கு மீண்டும் திரும்பியுள்ள கெனிஷா, கடந்த மே மாதம் வெளியிட்டிருந்த தனது உணர்ச்சிப்பூர்வமான பதிவை முழுமையாக நீக்கியுள்ளார். நடிகர் ரவி மோகனின் விவாகரத்து மற்றும் அதனைத் தொடர்ந்து எழுந்த சர்ச்சைகள் குறித்து வெளியிட்டிருந்த அந்தப் பதிவு தற்போது அவரது இன்ஸ்டாகிராம் பக்கத்தில் இல்லை. இதன் மூலம், கடந்த கால கசப்பான அனுபவங்களை மறந்து புதிய அத்தியாயத்தைத் தொடங்கும் மனநிலையில்தான் தற்போது இருப்பதாக அவரது ரசிகர்கள் கருதுகின்றனர்.
நடிகர் ரவி மோகனின் விவாகரத்து அறிவிப்புக்குப் பிறகு, கெனிஷா பிரான்சிஸ் சமூக வலைதளங்களில் கடுமையான இணைய விமர்சனங்களையும் இணையத் தாக்குதல்களையும் எதிர்கொண்டார். இதையடுத்து, தனது மன அமைதிக்காகவும் தனிப்பட்ட காரணங்களுக்காகவும் சமூக வலைதளப் பயன்பாட்டை தற்காலிகமாக நிறுத்துவதாக கடந்த மே மாதம் அறிவித்திருந்தார்.
அதே நேரத்தில், நடிகர் ரவி மோகன் தன்னிடம் மனநல ஆலோசனை பெறுவதற்காக மட்டுமே வந்ததாகவும், தனது தனிப்பட்ட வாழ்க்கை தொடர்பாக பரப்பப்பட்ட தகவல்கள் உண்மையல்ல என்றும் கெனிஷா ஏற்கனவே விளக்கம் அளித்திருந்தார். ரவி மோகனும் தனது குடும்பப் பிரச்சினைகளுக்கு கெனிஷா எந்த வகையிலும் காரணமல்ல என்று வெளிப்படையாகக் கூறி, அவருக்கு ஆதரவாக அறிக்கை வெளியிட்டிருந்தது குறிப்பிடத்தக்கது.
தனது சமூக வலைதள மறுபிரவேசத்தை கெனிஷா ஒரு சாதாரண புகைப்படத்துடன் தொடங்கவில்லை. சிவபெருமானை போற்றும் பக்திப் பாடலை தனது இன்ஸ்டாகிராம் பக்கத்தில் பகிர்ந்து, ஆன்மீக உணர்வோடு தனது புதிய பயணத்தைத் தொடங்கியுள்ளார். சமீபத்தில் கேரளாவில் உள்ள புகழ்பெற்ற மீன்குளத்தி பகவதி அம்மன் கோயில் திருவிழாவில் கலந்து கொண்டு பாடிய அனுபவத்தையும் அவர் பகிர்ந்து கொண்டுள்ளார்.
அந்தப் பதிவில், “பல ஆண்டுகளுக்கு ஒருமுறை நடைபெறும் இந்த விழாவில் பாடியது என் வாழ்க்கையின் மிகப்பெரிய பாக்கியம். வாழ்க்கை நமக்கு எதை வழங்கினாலும், மேடை விளக்குகள் எரியும்போது நாம் முழு திறமையுடன் எழுந்து நிற்க வேண்டும். ஆட்டம் தொடர வேண்டும்; நம்பிக்கையும் தொடர வேண்டும்” என்று அவர் ஆன்மீக ரீதியாக பதிவிட்டுள்ளார்.
பெங்களூரைச் சேர்ந்த கெனிஷா பிரான்சிஸ், பிரபல ஆங்கில இசை ரியாலிட்டி நிகழ்ச்சியான ‘தி ஸ்டேஜ்’ மூலம் பரவலாக அறிமுகமானவர். பாடகியாக மட்டுமல்லாமல், அங்கீகாரம் பெற்ற உளவியலாளர் மற்றும் ஆன்மீக குணப்படுத்துபவராகவும் அவர் செயல்பட்டு வருகிறார்.
இதற்கிடையில், கடந்த சில மாதங்களாக சமூக வலைதளங்களில் தனது பெயரை தொடர்புபடுத்தி பரப்பப்பட்ட அவதூறுகளுக்கு எதிராக சட்ட ரீதியான நடவடிக்கைகளை எடுக்கவும் கெனிஷா முடிவு செய்துள்ளார். நடிகர் ரவி மோகனின் விவாகரத்து விவகாரத்தில் தன்னை தொடர்புபடுத்தி யூடியூப், இன்ஸ்டாகிராம், ஃபேஸ்புக் மற்றும் எக்ஸ் உள்ளிட்ட சமூக வலைதளங்களில் வெளியிடப்பட்ட அவதூறான பதிவுகள் மற்றும் தவறான தகவல்களை இனி அனுமதிக்க முடியாது என்று அவர் திட்டவட்டமாக தெரிவித்துள்ளார்.
தனக்கு எதிராக இணையத்தில் அவதூறு பரப்பியவர்கள், தவறான தகவல்களை வெளியிட்டவர்கள் மற்றும் சமூக வலைதளங்களில் மோசமான விமர்சனங்களை முன்வைத்தவர்களின் விவரங்கள் மற்றும் ஆதாரங்கள் அனைத்தும் சேகரிக்கப்பட்டுள்ளதாகவும் அவர் குறிப்பிட்டுள்ளார்.
குறிப்பாக, சமூக வலைதளங்கள் வாயிலாக தனக்கு விடுக்கப்பட்ட பாலியல் வல்லுறவு மிரட்டல்கள் மற்றும் கொலை மிரட்டல்கள் தொடர்பாக தீவிரமான சட்ட நடவடிக்கை எடுக்கப்படும் என்று தனது அதிகாரப்பூர்வ இன்ஸ்டாகிராம் அறிக்கையில் எச்சரித்துள்ளார்.
இதனுடன், தனது இசைப் பயணத்திற்கும் புதிய தொடக்கத்தை அளிக்கும் வகையில், “ஓடி ஓடி” என்ற புதிய சுயாதீன பக்திப் பாடலை தனது அதிகாரப்பூர்வ யூடியூப் சேனலில் வெளியிட்டுள்ளார். சிவபெருமானை போற்றும் “ஓம் நமசிவாய” மந்திரப் பின்னணியைக் கொண்ட இந்தப் பாடல், அவரது இசைப் பயணத்தின் புதிய அத்தியாயமாக அமைந்துள்ளது.
சமூக வலைதளங்களில் எழுந்த சர்ச்சைகளைத் தொடர்ந்து சில மாதங்கள் அமைதியாக இருந்த கெனிஷா பிரான்சிஸ், தற்போது ஆன்மீகம், இசை மற்றும் சட்ட நடவடிக்கைகள் என மூன்று தளங்களிலும் புதிய தொடக்கத்தை அறிவித்திருப்பது இணையத்தில் பரவலாக பேசப்பட்டு வருகிறது. கடந்த கால சர்ச்சைகளுக்கு முற்றுப்புள்ளி வைத்து, கலைப் பயணத்தையும் தனிப்பட்ட வாழ்க்கையையும் புதிய நம்பிக்கையுடன் முன்னெடுக்க அவர் எடுத்துள்ள இந்த முடிவு ரசிகர்களிடையே கவனத்தை ஈர்த்துள்ளது.