இலங்கையின் திருகோணமலை மாவட்ட பொது வைத்தியசாலையில், 55 வயது மதிக்கத்தக்க நபரின் சிறுநீர்ப்பையில் இருந்து 3.1 கிலோ எடையுள்ள ராட்சதக் கல்லை அறுவை சிகிச்சை மூலம் மருத்துவர்கள் வெற்றிகரமாக அகற்றியுள்ளனர்.
சுமார் 17 சென்டிமீட்டர் நீளமுடைய இந்தக் கல், ஒரு மாதக் குழந்தையின் எடைக்கு நிகரானதாகவும், நெருப்புக்கோழி முட்டையின் அளவைக் கொண்டதாகவும் இருந்ததாக மருத்துவர்கள் தெரிவித்துள்ளனர்.
சிறுநீரக அறுவை சிகிச்சை நிபுணர் டாக்டர் பிரகலாதன் பாலகிருஷ்ணன் தலைமையிலான மருத்துவக் குழுவினர் இந்தச் சிக்கலான அறுவை சிகிச்சையை மேற்கொண்டுள்ளனர். ஆகஸ்ட் 14ஆம் தேதி நடைபெற்ற அறுவை சிகிச்சையில் கல் முழுமையாக அகற்றப்பட்டதாகத் தெரிவிக்கப்பட்டுள்ளது.
பக்கவாதத்தால் பாதிக்கப்பட்ட அந்த நோயாளி, சுமார் ஒரு மாதத்திற்கு முன்பு திருகோணமலை பொது மருத்துவமனையில் சிகிச்சைக்காக அனுமதிக்கப்பட்டிருந்தார். அவருக்கு சிறுநீர் கழிப்பதில் கடுமையான சிரமம் இருந்ததை மருத்துவர்கள் கவனித்ததைத் தொடர்ந்து, வயிற்றுப் பகுதியில் மேற்கொள்ளப்பட்ட பரிசோதனைகளில் அசாதாரணமான பெரிய அமைப்பு இருப்பது கண்டறியப்பட்டது. விரிவான பரிசோதனைகளுக்குப் பின்னர் அது சிறுநீர்ப்பையில் உருவான ராட்சதக் கல் என்பது தெரியவந்தது.
இந்தக் கல் சிறுநீர்ப்பையில் உருவாகி வளர 5 முதல் 10 ஆண்டுகள் வரை எடுத்திருக்கலாம் என மருத்துவர்கள் கருதுகின்றனர். சிறுநீர்ப்பை முழுமையாக காலியாகாமல் நீண்ட காலம் சிறுநீர் தேங்கும்போது, அதிலுள்ள தாதுக்கள் படிகங்களாக மாறி கற்கள் உருவாகும்.
குறிப்பாக பக்கவாதம் போன்ற நரம்பியல் பாதிப்புகளால் சிறுநீர்ப்பையின் செயல்பாடு பாதிக்கப்படுபவர்கள், நீண்ட காலம் கதீட்டர் பயன்படுத்துபவர்கள் மற்றும் புரோஸ்டேட் சுரப்பி வீக்கம் உள்ளவர்களுக்கு இத்தகைய கற்கள் உருவாகும் அபாயம் அதிகமாக இருப்பதாக மருத்துவர்கள் விளக்கியுள்ளனர்.
பொதுவாக 4 சென்டிமீட்டருக்கு மேல் உள்ள சிறுநீர்ப்பைக் கற்கள் ‘ராட்சதக் கற்கள்’ எனக் குறிப்பிடப்படுகின்றன. ஆனால், இந்த நோயாளியிடம் அகற்றப்பட்ட கல் சுமார் 17 சென்டிமீட்டர் நீளமுடையது என்பது அதன் அசாதாரணமான அளவை வெளிப்படுத்துகிறது.
கின்னஸ் உலகச் சாதனைப் பதிவின்படி, 2003ஆம் ஆண்டு பிரேசிலில் 1.9 கிலோ எடையுள்ள சிறுநீர்ப்பைக் கல் அகற்றப்பட்டது என்பதே தற்போதைய அதிகாரப்பூர்வ சாதனையாக உள்ளது. அந்தக் கல் 17.9 சென்டிமீட்டர் நீளமுடையதாக இருந்தது.
திருகோணமலையில் தற்போது அகற்றப்பட்ட 3.1 கிலோ கல், எடையின் அடிப்படையில் அந்தச் சாதனையைவிட பெரியதாக இருப்பதால், கின்னஸ் உலகச் சாதனைக்காகப் பரிந்துரைக்கப்பட்டுள்ளதாக தெரிவிக்கப்பட்டுள்ளது. இருப்பினும், கின்னஸ் உலகச் சாதனை அதிகாரப்பூர்வமாக உறுதி செய்யப்படும் வரை இதனை புதிய உலகச் சாதனை எனக் குறிப்பிடுவது சரியாக இருக்காது.
அறுவை சிகிச்சைக்குப் பின்னர் நோயாளி நல்ல உடல்நிலையில் இருப்பதாக டாக்டர் தெரிவித்துள்ளார். எனினும், பக்கவாதம் உள்ளிட்ட அவரது பிற உடல்நலப் பிரச்சினைகளுக்கான சிகிச்சைகள் தொடர்ந்து மருத்துவமனையில் வழங்கப்பட்டு வருகின்றன.
இலங்கையில் சிறுநீரகக் கல் அகற்றலில் ஏற்கனவே குறிப்பிடத்தக்க உலகச் சாதனை பதிவு செய்யப்பட்டுள்ளது. 2023ஆம் ஆண்டு கொழும்பில் ஓய்வுபெற்ற ராணுவ வீரர் ஒருவரின் சிறுநீரகத்தில் இருந்து 800 கிராம் எடையுள்ள, 13.372 சென்டிமீட்டர் நீளமுடைய கல் அகற்றப்பட்டது. அது உலகின் மிகப்பெரிய மற்றும் அதிக எடையுள்ள சிறுநீரகக் கல் என கின்னஸ் உலகச் சாதனையில் பதிவாகியுள்ளது.
இந்நிலையில், திருகோணமலை மருத்துவக் குழுவின் தற்போதைய சாதனை இலங்கையின் மருத்துவத் துறைக்கு மற்றுமொரு பெருமையைச் சேர்த்துள்ளது. குறைந்த அளவிலான வளங்களை திறம்படப் பயன்படுத்தி, இவ்வளவு சிக்கலான அறுவை சிகிச்சையை வெற்றிகரமாக மேற்கொண்ட மருத்துவக் குழுவினருக்கு மருத்துவமனை நிர்வாகமும் பாராட்டு தெரிவித்துள்ளது.
மனித உடலுக்குள் 3.1 கிலோ எடையுள்ள கல் உருவாகி வளர்ந்திருப்பது மருத்துவ ரீதியாக மிகவும் அரிய நிகழ்வாகக் கருதப்படுகிறது. அதனை பாதுகாப்பாக அகற்றி, நோயாளியை நலமுடன் மீட்டிருப்பது திருகோணமலை மருத்துவக் குழுவின் திறமைக்கும் மருத்துவத் துறையின் முன்னேற்றத்திற்கும் முக்கிய எடுத்துக்காட்டாக அமைந்துள்ளது.
கின்னஸ் உலக சாதனைகளின்படி, 2003-ஆம் ஆண்டு பிரேசிலில் ஒரு நோயாளிடமிருந்து உலகின் மிகப்பெரிய சிறுநீர்ப்பைக் கல் அகற்றப்பட்டது. அதன் எடை 1.9 கிலோகிராம் (4.2 பவுண்ட்) மற்றும் நீளம் 17.9 சென்டிமீட்டர் (7 அங்குலம்) ஆகும்.