பிரிட்டனில் குடும்பத்தினர் யாருமின்றித் தனியாக வாழ்ந்த 99 வயது மூதாட்டியை ஏமாற்றி, அவருக்குச் சொந்தமான வீடு மற்றும் பணம் என மொத்தம் சுமார் ரூ.9.6 கோடி மதிப்பிலான சொத்துகளை மோசடி செய்ததாகக் குற்றஞ்சாட்டப்பட்ட நர்ஸ் ரெபெக்கா லூயிஸ் பர்வூட் (Rebecca Louise Burwood) மீதான தொழில்முறை முறைகேடுகள் விசாரணையில் அம்பலமாகியுள்ளன.
இந்த விவகாரத்தில், அவரது செயல்கள் கடுமையான தொழில்முறை முறைகேடு எனத் தீர்ப்பளித்த பிரிட்டனின் நர்சிங் மற்றும் மிட்வைஃபரி கவுன்சில் (Nursing and Midwifery Council – NMC), அவரை நர்சிங் பதிவேட்டில் இருந்து நீக்கி நடவடிக்கை எடுத்துள்ளது.
வேல்ஸ் பகுதியில் உள்ள பிரைன் யர் ஹால் (Bryn Yr Haul) முதியோர் பராமரிப்பு இல்லத்தில் துணை மேலாளராகப் பணியாற்றியவர் ரெபெக்கா. அவருக்கும் பாதிக்கப்பட்ட மூதாட்டிக்கும் இடையே 2017ஆம் ஆண்டு முதலே பழக்கம் இருந்துள்ளது.
எதிர்பாராத விதமாகக் கீழே விழுந்து மூதாட்டி பலத்த காயமடைந்தபோது, அவருக்குக் குடும்பத்தினர் யாரும் இல்லை என்பதையும், அவர் தனிமையில் இருப்பதையும் அறிந்த ரெபெக்கா, அவரிடம் நெருக்கமாகப் பழகி நம்பிக்கையைப் பெற்றுள்ளார். மூதாட்டியைத் தனது சொந்தப் பாட்டியைப் போலக் கருதுவதாகக் கூறி, அவரை அன்பாக ‘நானா’ (Nana) என்று அழைத்து வந்துள்ளார்.
மூதாட்டி 2018ஆம் ஆண்டு பிரைன் யர் ஹால் முதியோர் பராமரிப்பு இல்லத்திற்குக் குடிபெயர்ந்தார். அப்போது அங்கு துணை மேலாளராகப் பணியாற்றிய ரெபெக்கா, மூதாட்டியின் நம்பிக்கையைப் பயன்படுத்திக்கொண்டு அவரது சொத்துகள் மற்றும் பணத்தைத் தனது கட்டுப்பாட்டிற்குள் கொண்டுவர முயன்றதாகக் கூறப்படுகிறது. 2018ஆம் ஆண்டில் தனது நண்பர் ஒருவரைச் சாட்சியாக வைத்துக்கொண்டு, மூதாட்டியின் சொத்துகள் மற்றும் பணத்தை நிர்வகிப்பதற்கான சட்டப்பூர்வ அதிகாரத்தைப் பெற்றுள்ளார்.
இது ‘லாஸ்டிங் பவர் ஆஃப் அட்டர்னி’ (Lasting Power of Attorney – LPA) எனப்படுகிறது. இந்த ஏற்பாடு குறித்து தான் பணிபுரிந்த முதியோர் இல்ல நிர்வாகத்திடம் அவர் தெரிவிக்கவில்லை என விசாரணையில் தெரியவந்துள்ளது.
2017 முதல் 2023ஆம் ஆண்டு வரையிலான காலகட்டத்தில், மூதாட்டிக்குச் சொந்தமான சுமார் 7.7 லட்சம் பவுண்டுகள் (£770,000), அதாவது இந்திய மதிப்பில் சுமார் ரூ.9.6 கோடி அளவிலான சொத்துகளையும் பணத்தையும் ரெபெக்கா முறைகேடாகப் பயன்படுத்தியதாக விசாரணையில் தெரிவிக்கப்பட்டது.
இதில், சுமார் 4 லட்சம் பவுண்டுகள் (£400,000), அதாவது ரூ.5 கோடி மதிப்புள்ள மூதாட்டியின் வீட்டைத் தனது பெயருக்கு மாற்றிக்கொண்டதும் அடங்கும். மேலும், மூதாட்டியின் வங்கிக் கணக்கிலிருந்து சுமார் 3.7 லட்சம் பவுண்டுகள் (£370,000), அதாவது ரூ.4.6 கோடி பணத்தைப் பல்வேறு வழிகளில் எடுத்துப் பயன்படுத்தியதாகக் குற்றச்சாட்டுகள் முன்வைக்கப்பட்டன.
மூதாட்டியின் வங்கிக் கணக்கிலிருந்து எடுக்கப்பட்ட தொகையில் சுமார் 1.6 லட்சம் பவுண்டுகள் (£160,000), அதாவது ரூ.2 கோடியை ஏடிஎம் இயந்திரங்கள் மூலம் ரொக்கமாக எடுத்துள்ளார். இந்தப் பணத்தைத் தனது சொந்த வீட்டைப் புதுப்பிக்கவும், வீட்டுச் செலவுகள் மற்றும் கட்டணங்களைச் செலுத்தவும் ரெபெக்கா பயன்படுத்தியுள்ளார். மேலும், கார் மற்றும் கேம்பர் வேன் வாங்குவதற்கும், அழகு சாதன அறுவைச் சிகிச்சை (Cosmetic Surgery) செய்துகொள்வதற்கும் மூதாட்டியின் பணத்தைப் பயன்படுத்தியதாகக் குற்றஞ்சாட்டப்பட்டது.
2023ஆம் ஆண்டு மார்ச் மாதத்தில், மூதாட்டியின் வங்கிக் கணக்கிலிருந்து வழக்கத்திற்கு மாறாகத் தொடர்ந்து அதிக அளவில் பணம் எடுக்கப்படுவதைக் கவனித்த வங்கி அதிகாரிகள் சந்தேகமடைந்தனர். இதையடுத்து, வங்கிக் கணக்கு முடக்கப்பட்டதுடன், சம்பவம் குறித்து காவல்துறைக்கும் தகவல் தெரிவிக்கப்பட்டது. பின்னர், மூதாட்டியின் வங்கிக் கணக்கை மீண்டும் செயல்பாட்டிற்குக் கொண்டுவரும் முயற்சியில் ரெபெக்கா அவரை நேரில் வங்கிக்கு அழைத்துச் சென்றுள்ளார்.
அப்போது, பணத்தை எடுக்க அனுமதி அளிக்காவிட்டால் மூதாட்டியை வெளியே எங்கும் அழைத்துச் செல்ல மாட்டேன் என்று ரெபெக்கா மிரட்டியதை வங்கி ஊழியர்கள் கேட்டதாகத் தெரிவிக்கப்பட்டது. இதுகுறித்தும் அதிகாரிகளுக்குத் தகவல் அளிக்கப்பட்டது. இதற்கிடையில், மற்றொரு நர்ஸும் ரெபெக்கா மூதாட்டியை மிரட்டி ஆவணங்களில் கையெழுத்துப் பெறுவதாகப் புகார் அளித்தார். இதனால், மூதாட்டியின் பணம் மற்றும் சொத்துகள் தொடர்பான விவகாரம் மேலும் தீவிரமடைந்தது.
வங்கி அதிகாரிகள் அளித்த புகாரின் அடிப்படையில், நார்த் வேல்ஸ் காவல்துறையினர் (North Wales Police) 2023ஆம் ஆண்டு முதற்கட்ட விசாரணை நடத்தினர். அப்போது, ரெபெக்கா மீது நடவடிக்கை எடுக்க மூதாட்டி விரும்பவில்லை எனக் கூறப்படுகிறது. ரெபெக்கா தனது தவறுகளிலிருந்து பாடம் கற்றுக்கொண்டிருப்பார் என்றும், அவருடைய நட்புதான் தனக்கு முக்கியம் என்றும் மூதாட்டி காவல்துறையிடம் தெரிவித்ததாக விசாரணையில் குறிப்பிடப்பட்டது. இதனால், அப்போது காவல்துறை வழக்கைத் தொடர்ந்து முன்னெடுக்கவில்லை. எனினும், உள்ளூர் கவுன்சில் இந்த விவகாரத்தை நர்சிங் ஒழுங்காற்றுத் தீர்ப்பாயத்தின் கவனத்திற்குக் கொண்டுசென்றதால், தொடர்ந்து விசாரணை நடைபெற்றது.
மூதாட்டியிடமிருந்து சுமார் 9,000 பவுண்டுகள் (£9,000), அதாவது இந்திய மதிப்பில் ரூ.9 லட்சம் பெற்று, சொகுசு கேம்பர் வேன் ஒன்றை ரெபெக்கா வாங்கியதாக விசாரணையில் தெரிவிக்கப்பட்டது. வார இறுதி நாட்களில் மூதாட்டியை வெளியே அழைத்துச் செல்வதற்காகவே அந்த வேனை வாங்கியதாக அவர் விளக்கம் அளித்துள்ளார். ஆனால், உண்மையில் மூதாட்டியை அந்த வேனில் எங்கும் அழைத்துச் செல்லவில்லை என்றும், தனது சொந்தக் குடும்பத்தினருடன் சுற்றுலா செல்வதற்காகவே அதைப் பயன்படுத்தியதாகவும் விசாரணையில் தெரியவந்தது. அதேபோல், கார் வாங்குவதற்கும் மூதாட்டியின் பணத்தைப் பயன்படுத்தியதை நியாயப்படுத்த முயன்ற ரெபெக்கா, அவரை வெளியே அழைத்துச் செல்வதற்காகவே வாகனங்களை வாங்கியதாகக் கூறியுள்ளார்.
தனது வீட்டைப் புதுப்பிக்க மூதாட்டியின் பணத்தைப் பயன்படுத்தியது குறித்துக் கேட்கப்பட்டபோது, மீண்டும் ஊரடங்கு அறிவிக்கப்பட்டால் மூதாட்டியைத் தனது வீட்டில் தங்க வைப்பதற்காகவே வீட்டைப் புதுப்பித்ததாக ரெபெக்கா விளக்கம் அளித்துள்ளார். ஆனால், ஊரடங்கு அறிவிக்கப்படுவதற்கு முன்பே அந்தப் பணம் பயன்படுத்தப்பட்டிருந்தது விசாரணையில் சுட்டிக்காட்டப்பட்டது. இதன் மூலம், மூதாட்டியின் நலனுக்காகச் செலவிட்டதாக அவர் அளித்த விளக்கங்கள் கேள்விக்குள்ளாகின.
ரெபெக்காவின் செயல்களால் மூதாட்டியின் பெரும்பாலான சொத்துகளும் பணமும் தீர்ந்துபோனதாக விசாரணையில் தெரிவிக்கப்பட்டது. மூதாட்டி உயிரிழந்தபோது, அவரது பராமரிப்புச் செலவுகளை அடுத்த 23 மாதங்களுக்கு மட்டுமே சமாளிக்கக்கூடிய அளவுக்குப் பணம் எஞ்சியிருந்ததாகக் கூறப்பட்டது. அந்தத் தொகையும் தீர்ந்திருந்தால், மூதாட்டியின் பராமரிப்புச் செலவுகளைச் சமாளிப்பதில் கடுமையான சிக்கல் ஏற்பட்டிருக்கும். இதற்கிடையில், பாதிக்கப்பட்ட மூதாட்டி உயிரிழந்துவிட்டார்.
விசாரணையின்போது, ரெபெக்கா தனது செயல்களை நியாயப்படுத்தப் பல்வேறு விளக்கங்களை அளித்துள்ளார். மூதாட்டியைத் தனது சொந்தப் பாட்டியைப் போலக் கருதியதால்தான் தொழில்முறை எல்லைகளைத் தாண்டியதாகவும், செய்த தவறுகளுக்கு ஆழ்ந்த வருத்தம் தெரிவிப்பதாகவும் அவர் கூறியுள்ளார். இருப்பினும், அவரது விளக்கங்களைத் தீர்ப்பாயம் ஏற்கவில்லை. மூதாட்டியின் தனிமையையும் நம்பிக்கையையும் பயன்படுத்தி நீண்டகாலமாகப் பணம் மற்றும் சொத்துகளை முறைகேடாகப் பெற்றுக்கொண்ட செயல்கள் திட்டமிட்ட, இரக்கமற்ற மற்றும் தொழில்முறை ரீதியாக முற்றிலும் கண்டிக்கத்தக்கவை எனத் தீர்ப்பாயம் குறிப்பிட்டது.
இந்தச் செயல்கள் மருத்துவம் மற்றும் பராமரிப்புத் துறையின் நம்பகத்தன்மைக்கு எதிரான கடுமையான தொழில்முறை முறைகேடு எனத் தீர்ப்பளித்த பிரிட்டனின் நர்சிங் மற்றும் மிட்வைஃபரி கவுன்சில் (NMC), ரெபெக்கா லூயிஸ் பர்வூட்டை நர்சிங் பதிவேட்டில் இருந்து நீக்க உத்தரவிட்டது. இதன் மூலம், பிரிட்டனில் பதிவு செய்யப்பட்ட நர்ஸாகப் பணியாற்றுவதற்கான அவரது தொழில்முறை அனுமதி ரத்து செய்யப்பட்டுள்ளது. தனிமையில் இருந்த மூதாட்டியின் நம்பிக்கையைப் பயன்படுத்தி அவரது சொத்துகளையும் சேமிப்பையும் இழக்கச் செய்த இந்தச் சம்பவம், முதியோர் பராமரிப்புத் துறையில் பணியாற்றுவோரின் பொறுப்பும் தொழில்முறை நேர்மையும் எவ்வளவு முக்கியம் என்பதை மீண்டும் வலியுறுத்தியுள்ளது.