: தலைமைத் தேர்தல் ஆணையர் ஞானேஷ் குமார் பதவி விலகக் கோரி நடைபெற்ற போராட்டத்தில் கைது செய்யப்பட்டு, டெல்லி திஹார் சிறையில் உள்ள காக்கராச் ஜனதா கட்சி (Cockroach Janta Party – CJP) நிர்வாகிகள் சவுரவ் தாஸ் மற்றும் அசுதோஷ் ரங்கா ஆகியோருக்கு, அக்கட்சியின் நிறுவனர் அபிஜீத் திப்கே உருக்கமான கடிதம் எழுதியுள்ளார். தனது சக தோழர்கள் விரைவில் விடுதலையாகி மீண்டும் தங்களுடன் இணைய வேண்டும் என்று அவர் அதில் குறிப்பிட்டுள்ளார்.
தலைமைத் தேர்தல் ஆணையர் ஞானேஷ் குமார் பதவி விலக வேண்டும் என்றும், தேர்தல் வாக்காளர் பட்டியல் திருத்த நடவடிக்கைகளில் முறைகேடுகள் நடைபெற்றதாகவும் குற்றம்சாட்டி சிஜேபி அமைப்பினர் டெல்லியில் போராட்டம் நடத்தி வருகின்றனர்.
இதன் ஒரு பகுதியாக, ஜந்தர் மந்தர் பகுதியில் போராட்டம் நடத்த முயன்றபோது, காவல்துறையின் தடையை மீறி உள்ளே நுழைந்து தேசியக் கொடியை ஏந்தியதாக சவுரவ் தாஸ் மற்றும் அசுதோஷ் ரங்கா கைது செய்யப்பட்டனர். இதையடுத்து, இருவரும் திஹார் சிறையில் நீதிமன்றக் காவலில் அடைக்கப்பட்டனர்.
இந்நிலையில், இருவரும் சிறைக்குச் சென்று ஆறு நாட்கள் ஆனதாகக் குறிப்பிட்டுள்ள அபிஜீத் திப்கே, தனது சகோதரர்களைப் பிரிந்திருப்பதை வார்த்தைகளால் விவரிக்க முடியவில்லை எனத் தெரிவித்துள்ளார். வெளியில் தாம் சிஜேபி அமைப்பின் முகமாக அறியப்பட்டாலும், கட்சியை வழிநடத்துவதிலும், அனைவரையும் ஒருங்கிணைப்பதிலும் சவுரவ் தாஸ் மற்றும் அசுதோஷ் ரங்கா ஆகியோரின் பங்கு அளப்பரியது என்றும், அவர்கள் இல்லாமல் இந்த இயக்கம் இத்தகைய வளர்ச்சியை அடைந்திருக்காது என்றும் குறிப்பிட்டுள்ளார்.
இந்த இயக்கத்திற்காக இருவரும் செய்த தியாகங்களும் பங்களிப்புகளும் இன்னும் அதிகமான மக்களுக்குத் தெரிய வேண்டும் என விரும்புவதாகக் கூறியுள்ள அவர், போராட்டக் களத்தில் அவர்கள் சந்தித்த வலி, பதற்றம் மற்றும் நிச்சயமற்ற சூழ்நிலைகளுக்காக இருவரிடமும் அவர்களது குடும்பத்தினரிடமும் மன்னிப்புக் கேட்டுக்கொண்டுள்ளார். மேலும், இருவரும் விரைவில் விடுதலையாகி மீண்டும் தங்களுடன் இணைய வேண்டும் என்றும், “என் சகோதரர்களே, சீக்கிரம் திரும்பி வாருங்கள்” என்றும் உருக்கமாகக் குறிப்பிட்டுள்ளார்.
அசுதோஷ் ரங்கா, லண்டனில் அதிகச் சம்பளம் கிடைக்கும் கார்ப்பரேட் பணியைத் துறந்துவிட்டு இந்த இயக்கத்தில் இணைந்தவர் என்றும், சவுரவ் தாஸ் இந்தியாவின் சட்ட அமைப்பு குறித்து எழுதி வந்தவர் என்றும் அபிஜீத் திப்கே தெரிவித்துள்ளார். வசதியான வாழ்க்கையை விட்டுவிட்டு வீதிகளில் இறங்கிப் போராடி, சிறைவாசத்தையும் எதிர்கொண்டுள்ள இருவரின் பங்களிப்பையும் அவர் பாராட்டியுள்ளார்.
இதற்கிடையே, சவுரவ் தாஸ் மற்றும் அசுதோஷ் ரங்கா ஆகியோரின் ஐந்து நாள் நீதிமன்றக் காவல் முடிவடைந்த நிலையில், அவர்களது விடுதலை தொடர்பான விசாரணை தாமதமானதாகத் தகவல்கள் வெளியாகியுள்ளன. இந்த வழக்கை விசாரிக்க வேண்டிய சிறப்பு நிர்வாக மாஜிஸ்திரேட்டுக்கு மர்ம நபர்களிடமிருந்து கொலை மிரட்டல்கள் வந்ததாகக் கூறப்படுகிறது. இதனால் அவர் வழக்கிலிருந்து விலகியதாகவும், அதன் காரணமாக ஜாமீன் நடவடிக்கைகள் தாமதமானதாகவும் தெரிவிக்கப்பட்டுள்ளது.
இருவரின் நீதிமன்றக் காவல் நீட்டிக்கப்பட்டது குறித்து எக்ஸ் சமூக வலைதளத்தில் பதிவிட்ட அபிஜீத் திப்கே, அவர்கள் சட்டவிரோதமாகக் கைது செய்யப்பட்டுள்ளதாகக் குற்றம்சாட்டியுள்ளார். மேலும், அவர்களை விடுவிக்காமல் தடுப்பதற்கும், நீதிமன்ற நடவடிக்கைகளைத் தாமதப்படுத்துவதற்கும் அரசு பல்வேறு வழிகளைக் கையாள்வதாகவும் அவர் குற்றம் சாட்டியுள்ளார்.
நிபந்தனை ஜாமீனில் விடுவிக்கப்பட்டுள்ள அபிஜீத் திப்கே, தனது சொந்த ஊருக்குத் திரும்பியுள்ளார். அவருக்கு விதிக்கப்பட்ட நிபந்தனைகளின்படி, அடுத்த ஓராண்டுக்கு டெல்லியில் அமைதியைக் குலைக்கும் போராட்டங்களில் ஈடுபடக் கூடாது என்றும், 50 ஆயிரம் ரூபாய் பிணைத் தொகைக்கான நடைமுறைகளை நிறைவேற்ற வேண்டும் என்றும் தெரிவிக்கப்பட்டுள்ளது. சவுரவ் தாஸ் மற்றும் அசுதோஷ் ரங்கா விடுதலையான பிறகு, அடுத்தகட்ட சட்டப் போராட்டங்கள் குறித்து ஆலோசித்து முடிவெடுக்கப்படும் என்றும் அபிஜீத் திப்கே கூறியுள்ளார்.
இந்தக் கைது நடவடிக்கைக்கு எதிர்க்கட்சித் தலைவர் ராகுல் காந்தி கண்டனம் தெரிவித்துள்ளார். இளைஞர்களும் மாணவர்களும் தங்களது அரசியலமைப்பு உரிமைகளுக்காகப் போராடுவதாகக் குறிப்பிட்ட அவர், கைது நடவடிக்கையை அரசின் கோழைத்தனம் என விமர்சித்துள்ளார்.
மேலும், டெல்லி காவல்துறையின் செயல்பாடுகள் குறித்தும் அபிஜீத் திப்கே விமர்சனம் முன்வைத்துள்ளார். காவல்துறை அதிகாரி ஒருவர் பிரபல தாதா லாரன்ஸ் பிஷ்னோயைக் குறிப்பிடும்போது மரியாதையாகப் பேசுவதாகக் கூறிய அவர், அமைதியான முறையில் போராடும் மாணவர்களையும் சமூகச் செயற்பாட்டாளர்களையும் குற்றவாளிகளைப் போல நடத்துவதாகக் குற்றம்சாட்டியுள்ளார். அவர்களுக்கு அளிக்கப்படும் மரியாதையில் பத்து சதவீதம்கூட போராட்டக்காரர்களுக்கு வழங்கப்படுவதில்லை என்றும் அவர் தனது பதிவில் குறிப்பிட்டுள்ளார்.
இந்த விவகாரத்தில் மற்றொரு முக்கிய அம்சமாக, சிஜேபி அமைப்பினர் போராட்டம் நடத்துவதற்கு ஒரு நாள் முன்னதாகவே ஜந்தர் மந்தர் அதிகாரப்பூர்வப் போராட்டக் களங்களின் பட்டியலிலிருந்து நீக்கப்பட்டதாகச் செய்திகள் தெரிவிக்கின்றன. கடந்த முப்பது ஆண்டுகளுக்கும் மேலாகப் பல்வேறு முக்கியப் போராட்டங்கள் நடைபெற்ற இந்த இடத்தில், போராட்டங்களுக்கு அனுமதி மறுக்கப்பட்டிருப்பது குறித்தும் விவாதம் எழுந்துள்ளது.
சிஜேபி நிர்வாகிகள் மீதான கைது நடவடிக்கை மற்றும் டெல்லி காவல்துறையின் செயல்பாடுகள் தொடர்பாக அமெரிக்க நாடாளுமன்ற உறுப்பினர்கள் சிலரும் கவலை தெரிவித்துள்ளதாகக் கூறப்படுகிறது. இதனால், இந்த விவகாரம் சர்வதேச ஊடகங்களின் கவனத்தையும் ஈர்த்துள்ளது.
இதற்கிடையே, தேசியக் கொடியை ஏந்திப் போராடியதற்காக இளைஞர்கள் சிறையில் அடைக்கப்படுவது, பிரிட்டிஷ் ஆட்சிக் காலத்தில் சுதந்திரப் போராட்ட வீரர்கள் சிறையில் அடைக்கப்பட்டதற்கு நிகரானது என அபிஜீத் திப்கே ஒப்பிட்டுக் குற்றம்சாட்டியுள்ளார்.
சவுரவ் தாஸ் மற்றும் அசுதோஷ் ரங்கா ஆகியோரின் விடுதலைக்கான சட்ட நடவடிக்கைகள் தொடர்ந்து நடைபெற்று வரும் நிலையில், அவர்கள் வெளியே வந்த பிறகு அடுத்தகட்டப் போராட்டங்கள் மற்றும் சட்ட ஆலோசனைகள் குறித்து முடிவெடுக்கப்படும் என சிஜேபி நிறுவனர் அபிஜீத் திப்கே தெரிவித்துள்ளார்.